އޯ.އައި.ސީ ޔޫތް ކެޕިޓަލް 2026 ޕްރޮގްރާމްގެ ހަވާސާގައި، ދިވެހިރާއްޖޭގެ ޒުވާނުން ބާރުވެރިކުރުވުމާއި، ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުالله ރާފިއު، ތުރުކީގެ ޔޫތް އެންޑް ސްޕޯޓްސް މިނިސްޓަރ ޑރ. އުސްމާން އާޝިން ބަކްއާ ބައްދަލުކުރައްވައިފިއެވެ.
މި ބައްދަލުކުރެއްވުމުގައި ދެ ޤައުމުގެ ދެމެދުގައި ޒުވާނުންނާއި ކުޅިވަރުގެ ދާއިރާއިން އޮތް ގުޅުން އިތުރަށް ބަދަހިކޮށް، ދެ މިނިސްޓްރީ ގުޅިގެން މަސައްކަތް ކުރެވޭނެ ގޮތްތަކާމެދު ވަނީ ފުޅާ ދާއިރާއެއްގައި މަޝްވަރާކުރައްވާފައެވެ. އެގޮތުން ދެ ޤައުމުގެ ގުޅުން ރަސްމީ އޮނިގަނޑެއްގެ ތެރެއިން ތަންފީޒުކުރުމަށްޓަކައި، ފަހުމުނާމާ (އެމްއޯޔޫ) އެއްގައި ސޮއިކޮށް، ވީހާވެސް އަވަހަކަށް އެ މަސައްކަތްތައް ފެށުމަށް އިސްކަންދޭނެކަން ތުރުކީގެ ސްޕޯޓްސް މިނިސްޓްރީން ވަނީ ހާމަކޮށްފައެވެ.
މި އެއްބަސްވުމުގެ ދަށުން ތުރުކީގެ އެންމެ މަތީ ފެންވަރުގެ ޓްރެއިނިން ކޭމްޕުތަކުގައި ބައިވެރިވެ، ރާއްޖޭގެ އެތުލީޓުންނަށް މަތީ ފެންވަރުގެ ތަމްރީނުތައް ހޯދުމުގެ ފުރުސަތު ފަހިވެގެންދާނެއެވެ. މީގެ އިތުރުން، ބާސްކެޓްބޯޅައާއި ވޮލީބޯޅައިގެ ދާއިރާއިން ދިވެހި ކޯޗުންގެ ހުނަރު އިތުރަށް ތަރައްޤީކޮށް، ތަމްރީނު ހޯދައިދިނުމާ ގުޅޭގޮތުންވެސް ދެ މިނިސްޓަރުން މަޝްވަރާކުރެއްވިއެވެ.
އެކުލަވާލުމަށް ހަމަޖެހިފައިވާ އެމްއޯޔޫގެ ދަށުން ސްޕޯޓްސް ޕާފޯމަންސް އަދި ސްޕޯޓްސް ސައިންސް މަތީ ފެންވަރަކަށް ގެންދިއުމާއި، އެޑަޕްޓިވް ސްޕޯޓްސް އަދި ޕެރަލިމްޕިކް ޑިވެލޮޕްމަންޓްގެ ދަށުން ނުކުޅެދުންތެރިކަން ހުންނަ ފަރާތްތަކުގެ ކުޅިވަރުތައް ތަރައްޤީކުރުމަށް ވަނީ ނިންމާފައެވެ. މީގެއިތުރުން ޒުވާނުންގެ ކުރިއެރުމަށްޓަކައި ޔޫތް އިނޮވޭޝަން ހަބްތައް ޤާއިމުކުރުމާއި، ރީޖަނަލް ޔޫތް އެންޑް ސްޕޯޓްސް ފެސިލިޓީސް ތަރައްޤީކުރުން ހިމެނެއެވެ.
ހަމައެއާއެކު، ތަޢުލީމާއި ތަމްރީނުގެ ދާއިރާއިން ޔޫތް އެންޑް އެތުލީޓް އެކްސްޗޭންޖް ޕްރޮގްރާމްތަކާއި ސްކޮލަޝިޕްގެ ފުރުސަތުތައް ފަހިކޮށްދިނުމުގެ އިތުރުން، ޑޭޓާ ޑްރައިވިން ގަވަނަންސްއާއި، އާންމު ސިއްޙަތާއި ބަލިތަކުން ރައްކާތެރިވުމުގެ ޕްރޮގްރާމްތައް ކުރިއަށްގެންދިއުމަށްވެސް ވަނީ ހަމަޖެހިފައެވެ.
މި ބައްދަލުކުރެއްވުން ނިންމާލައްވާފައިވަނީ ދިވެހި ޒުވާނުންނާއި އެތުލީޓުންނަށް އިތުރު ފުރުސަތުތައް ފަހިކޮށްދީ، ކުޅިވަރުގެ ރޮނގުން އިތުރު ކާމިޔާބީތަކެއް ހޯދުމަށް ދެ ޤައުމު ގުޅިގެން ސާބިތުކަމާއެކު މަސައްކަތްކުރުމުގެ އެއްބަސްވުމާއެކުގައެވެ.
