ނުކުޅެދުންތެރިކަން ހުންނަ ފަރާތްތަކަށް އަބުރުވެރި ދިރިއުޅުމެއް ހޯދައިދިނުމަށާއި، އެ ފަރާތްތައް ބާރުވެރިކުރުވުމަށް ސަރުކާރުން ކުރަމުންދާ މަސައްކަތްތަކުގެ ތެރެއިން މިހާތަނަށް އެފަދަ 416 ފަރާތަކަށް ވަޒީފާގެ ފުރުޞަތު ފަހިކޮށްދީފައިވާ ކަމަށް ސިއްހަތާއި، އާއިލާއާއި އިޖްތިމާއީ އެހީއާ ބެހޭ ވަޒީރު ޤީލާ ޢަލީ ވިދާޅުވެއްޖެއެވެ.
އެކަމަނާ މިކަން ހާމަކުރެއްވީ ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމުގައެވެ.
ވަޒީރު ޤީލާ ވިދާޅުވީ، ނުކުޅެދުންތެރިކަން ހުންނަ މީހުންނަކީ މުޖުތަމަޢުގައި ބާކީނުވެ، ޢިއްޒަތާއި ޤަދަރާއެކު ދިރިއުޅޭ ބަޔަކަށް ހެއްދެވުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ މުހިންމު ތަޞައްވުރެއް ކަމަށެވެ. މި ތަޞައްވުރާ އެއްގޮތަށް ސަރުކާރުގެ އޮފީސްތަކާއި ކުންފުނިތައް މެދުވެރިކޮށް އެ ފަރާތްތަކަށް ވަޒީފާ ހަމަޖައްސައިދިނުމުގެ ޚާއްޞަ މަސައްކަތްތަކެއް ދަނީ ކުރެވެމުންނެވެ.
ވަޒީފާތަކަށް މީހުން ހަމަޖެއްސުމުގެ އިތުރުން، އެ ފަރާތްތަކަށް މަސައްކަތުގެ މާޙައުލަށް އަހުލުވެރިވުމަށް ބޭނުންވާ ޚާއްޞަ ތަމްރީނު ޕްރޮގްރާމްތައް ވެސް ހިންގާފައިވާ ކަމަށް ވަޒީރު ފާހަގަކުރެއްވިއެވެ.
ހަމައެއާއެކު، ވަޒީފާގެ މާޙައުލަކީ އެ ފަރާތްތަކަށް ފަސޭހައިން މަސައްކަތްކުރެވޭނެ އެކުވެރި އަދި ރައްކާތެރި ތަނަކަށް ހެދުމަށްޓަކައި މުވައްޒަފުން ހޭލުންތެރިކުރުވުމުގެ ސެންސިޓައިޒޭޝަން ޕްރޮގްރާމްތަކާއި، ގުޅިގެން މަސައްކަތްކުރުމުގެ ހުނަރުތައް ދަސްކޮށްދިނުމުގެ ޕްރޮގްރާމްތައް ވެސް ވަނީ ކުރިއަށް ގެންގޮސްފައެވެ.
ވަޒީރު ޤީލާ ޢަލީ ފާހަގަކުރެއްވި ގޮތުގައި، މިގޮތަށް ވަށާޖެހޭ އުޞޫލަކުން ވަޒީފާގެ ފުރުޞަތުތައް ފަހިވެގެން ދިޔުމަކީ އެ ފަރާތްތަކުގެ ޢާއިލާތަކަށް ލިބިގެންދިޔަ ވަރަށް ބޮޑު ހިތްހަމަޖެހުމަކާއި އުފަލެކެވެ.
މި ސިޔާސަތުގެ މައިގަނޑު އަމާޒަކީ ނުކުޅެދުންތެރިކަން ހުންނަ ފަރާތްތައް މުޖުތަމަޢުގެ ކަންކަމުގައި ފުރިހަމައަށް ޝާމިލުކޮށް، އެއްވެސް މީހަކު ބާކީނުކޮށް، އިޤްތިޞާދީ ގޮތުން އެމީހުން ބާރުވެރި ބަޔަކަށް ހެދުން ކަމަށް ވަޒީރު ވިދާޅުވިއެވެ.
