އުމުރުން ދުވަސްވީ މީހުންނަކީ އާއިލާތަކާއި މުޖުތަމައުގެ އެންމެ މުހިންމު ބައިވެރިން ކަމަށާއި، އެ ފަރާތްތަކަކީ އަޅުގަނޑުމެންގެ ސަގާފަތް ދަމަހައްޓައި، އެއް ޖީލުން އަނެއް ޖީލަށް ޙިކުމަތްތެރިކަން ފޯރުކޮށްދޭ ފަރާތްތައް ކަމަށް ރައީސުލްޖުމްހޫރިއްޔާގެ އަނބިކަނބަލުން މެޑަމް ސާޖިދާ މުޙައްމަދު ވިދާޅުވެއްޖެއެވެ.
ބައިނަލްއަޤްވާމީ ގޮތުން ފާހަގަކުރާ އުމުރުން ދުވަސްވީ މީހުންގެ ދުވަހުގެ މުނާސަބަތުގައި ސޯޝަލް މީޑިއާގައި ކުރެއްވި ޕޯސްޓެއްގައި މެޑަމް ސާޖިދާ ވިދާޅުވީ، މުޖުތަމައަށް އުމުރުން ދުވަސްވީ މީހުން ކޮށްދޭ އަގުހުރި ޚިދުމަތްތައް ބަލައިގަނެ، އެ ފަރާތްތަކުގެ ހައްގުތަކާއި ދުޅަހެޔޮކަން ކަށަވަރުކުރުމަށް މަސައްކަތް ކުރަންޖެހޭ ކަމަށެވެ.
އުމުރުން ދުވަސްވީ މީހުންގެ އާބާދީ އިތުރުވަމުންދާ މިންވަރަށް އަލިއަޅުއްވާލައްވަމުން އެކަމަނާ ވިދާޅުވީ، ދިރިއުޅުމުގެ ކޮންމެ މަރުހަލާއެއްގައިވެސް އެކަކު އަނެކަކަށް އަޅާލައި އެހީތެރިކަން ފޯރުކޮށްދޭނެ ގޮތްތަކާމެދު އަލުން ވިސްނަންޖެހޭ ކަމަށެވެ. އަދި އުމުރުން ދުވަސްވީ މީހުންނަށް މާނަވީ އިޖުތިމާއީ ގުޅުންތައް ގާއިމުކުރުމަށާއި، ދުޅަހެޔޮ، ހިތްހަމަޖެހޭ އަދި އަބުރުވެރި ދިރިއުޅުމެއް އުޅުމުގެ ފުރުސަތުތައް ފަހިކޮށްދޭންޖެހޭ ކަމަށްވެސް ފާހަގަކުރެއްވިއެވެ.
މީގެ އިތުރުން، ސިޔާސަތުތައް އެކުލަވާލުމުގައި ދުޅަހެޔޮ ސިއްހަތެއްގައި ދެމިތިބުމަށް ކުރެވޭ ދެމެހެއްޓެނިވި އިންވެސްޓްމަންޓްތަކާއި، ފަސޭހައިން ލިބޭ ސިއްހީ ޚިދުމަތުގެ ނިޒާމަކާއި، ހަރުދަނާ އިޖުތިމާއީ ރައްކާތެރިކަމާއި، މާނަވީ އިގްތިސާދީ ފުރުސަތުތައް ހިމެނެންޖެހޭ ކަމަށް މެޑަމް ސާޖިދާ ވިދާޅުވިއެވެ. އަދި އެކުވެރި، އޯގާތެރި އަދި އަޅާލާ މުޖުތަމައެއް ބިނާކުރުމަށްޓަކައި ގައުމީ ތަރައްގީގެ ދަތުރުގައި އުމުރުން ދުވަސްވީ މީހުންގެ ބައިވެރިވުން ކަށަވަރުކުރުމަކީ މުހިންމު ކަމެއް ކަމަށް ވިދާޅުވިއެވެ.
އެކަމަނާގެ މެސެޖު ނިންމަވާލައްވަމުން ވިދާޅުވީ، ދުޅަހެޔޮކަމުގައި ހޭދަކުރެވޭ އުމުރު ދިގުކޮށް، އުމުރުން ދުވަސްވުމުގައި އެކި މީހުންގެ ތަޖުރިބާތައް ތަފާތުވާނެކަން ދެނެގަނެގެން، ކޮންމެ މީހަކީވެސް އަބުރުވެރިކަމާއި، މަގުސަދަކާއި، ރައްކާތެރިކަމާއެކު އުމުރުން ދުވަސްވުމުގެ ފުރުސަތު ލިބިގެންދާ ބައެއްކަން ކަށަވަރުކުރެވޭނެ ކަމަށެވެ.
