މިއަދު ފާހަގަކުރަމުންދާ ޕީޕަލްސް ރިޕަބްލިކް އޮފް ޗައިނާގެ 77 ވަނަ ޤައުމީ ދުވަހުގެ މުނާސަބަތުގައި، އެ ޤައުމުން ދިވެހިރާއްޖެއަށް ކަނޑައަޅުއްވާފައި ހުންނަވާ ސަފީރު ކޮންގ ޒިއަންހުއާ، ދިވެހިރައްޔިތުންނަށާއި ދެ ޤައުމުގެ ރައްޔިތުންނަށް ދުވަހުގެ މަރުޙަބާއާއި ތަހުނިޔާ އަރިސްކުރައްވައިފިއެވެ.
މި އުފާވެރި މުނާސަބަތާ ގުޅިގެން ދެއްވި މެސެޖެއްގައި ސަފީރު ވިދާޅުވީ، މިއަދަކީ ޗައިނާގެ ޤައުމީ ދުވަސް ފާހަގަކުރާ ޚާއްޞަ ދުވަސް ކަމަށާއި، މި އުފާވެރި ވަގުތުގައި ދެ ޤައުމުގެ އެކުވެރިންވެސް ބައިވެރިވާ ކަމީ ލިބޭ ބޮޑު އުފަލެއް ކަމަށެވެ. އަދި ދިވެހިރާއްޖެއާއި ޗައިނާއާ ދެމެދު އޮތް ގާތް، ބަދަހި ގުޅުމަކީ އަބަދުވެސް ނުހަނު އަގުވަޒަންކުރާ މުހިންމު ގުޅުމެއްކަން އެމަނިކުފާނު ފާހަގަކުރެއްވިއެވެ.
ސަފީރު ކޮންގ ޒިއަންހުއާ އިތުރަށް ވިދާޅުވީ، 2024 ވަނަ އަހަރު ޗައިނާއާއި ދިވެހިރާއްޖޭގެ އިސް ލީޑަރުން ބޭއްވެވި ތާރީޚީ ބައްދަލުވުމަކީ ދެ ޤައުމުގެ ދެމެދުގައި އޮތް ފުރިހަމަ ސްޓްރެޓީޖިކް ކޯޕަރޭޓިވް ޕާޓްނާޝިޕްގެ ގުޅުން އިތުރު ހަރުފަތަކަށް އަރުވައި، ވަރުގަދަ ބިންގަލެއް އެޅިގެންދިޔަ މުހިންމު ދަނޑިވަޅެއް ކަމަށެވެ.
ޚަބަރު ނިންމަވާލައްވަމުން ސަފީރު ވަނީ، ޗައިނާއާއި ދިވެހިރާއްޖެއާ ދެމެދު އޮތް ޒަމާންވީ އެކުވެރިކަމާއި އެކުވެރި ގުޅުން ކުރިއަށް އޮތް ތަނުގައިވެސް އިތުރަށް ބަދަހިވެ ދެމިއޮތުމަށް އެދިވަޑައިގެން، އިޚްލާޞްތެރި ހެޔޮއެދުންތައް އަރިސްކުރައްވާފައެވެ.
