ވޭތުވެދިޔަ މަދު އަހަރުތަކުގެ ތެރޭގައި ދިވެހިރާއްޖެއާއި ޗައިނާއާ ދެމެދު އޮތް ގުޅުން ވަނީ ޝައްކެއްވެސްނެތް މިންވަރަށް އައު އުސްމިންތަކަކަށް ވާސިލުވެފައި ކަމަށް ރައީސުލްޖުމްހޫރިއްޔާގެ ނައިބު އަލްއުސްތާޛު ޙުސައިން މުޙައްމަދު ލަޠީފް ވިދާޅުވެއްޖެއެވެ.
ނައިބު ރައީސް މިހެން ވިދާޅުވީ، ޗައިނާގެ ޤައުމީ ދުވަހުގެ މުނާސަބަތުގައި، އެ ޤައުމުގެ ނައިބު ރައީސް ހާން ޒެންގް އަދި ޗައިނާގެ ރައްޔިތުންނަށް ފޮނުއްވެވި ޚާއްޞަ ތަހުނިޔާގެ މެސެޖުގައެވެ.
ޕީޕަލްސް ރިޕަބްލިކް އޮފް ޗައިނާ އުފެދުނުތާ 77 އަހަރު ފުރުމުގެ އުފާވެރި މުނާސަބަތާ ގުޅުވައިގެން ފޮނުއްވި މި މެސެޖުގައި، ނައިބު ރައީސް ވަނީ އެ ޤައުމުގެ ނައިބު ރައީސް ހާން ޒެންގް އަށާއި އެކުވެރި ޗައިނާގެ އެންމެހައި ރައްޔިތުންނަށް އިޚްލާޞްތެރިކަމާއެކު ހެޔޮއެދުންތައް އަރިސްކުރައްވާފައެވެ.
ދެ ޤައުމުގެ ގުޅުމާ ގުޅޭގޮތުން އިތުރަށް ވާހަކަފުޅު ދައްކަވަމުން ނައިބު ރައީސް ވިދާޅުވީ، ދިވެހިރާއްޖެއާއި ޗައިނާއާ ދެމެދުގައި އޮތް ބަދަހި އެކުވެރިކަމާއި، އެއްބަޔަކު އަނެއްބަޔަކަށް ދޭ ފުރިހަމަ އިޙްތިރާމާއި އިޢުތިމާދުގެ މައްޗަށް ބިނާވެފައިވާ ގާތް ގުޅުން ކުރިއަށް އޮތް އަހަރުތަކުގައި އިތުރަށް ވަރުގަދަވެގެންދާނެ ކަމުގެ ފުރިހަމަ ޔަޤީންކަން އެބައޮތް ކަމަށެވެ.
