ޗައިނާ އާއި ރާއްޖެއާ ދެމެދު ވެފައިވާ މިނިވަން ވިޔަފާރީގެ އެއްބަސްވުން އަދި ބާތިލްކޮށްފައި ނުވާކަމަށް ޚާރިޖީވަޒީރު ޢަބްދުﷲ ޝާހިދު ޝާހިދު ވިދާޅުވެއްޖެއެވެ. ޚާރިޖިއްޔާގައި މިއަދު ބޭއްވި ނޫސްވެރިންގެ ބައްދަލުވުމުގައި ޝާހިދު ވިދާޅުވީ ޗައިނާއިން ރާއްޖެއަށް ނަގާފައިވާ ލޯނުތަކުގެ ފުރިހަމަ އަދަދު އަދި ސާފުނުވާ ކަމަށެވެ. ޝާހިދު މިމޭރުމުން ވިދާޅުވެފައިވާއިރު ބޭރު ޤަުމުތަކުން ލޯނު ނެގުމަށްޓަކައި ސަރުކާރުން، ސަރުކާރުގެ ކުންފުނިތަކަށާއި އެކިފަރާތްތަކަށް ދޫކޮށްފައިވާ ސޮވްރިން ގަރަންޓީ ތަކުގެ އަދަދު ސާފުނުވާ ކަމަށް އެމްއެމްޢޭއިން ވަނީ ބުނެފައެވެ.
އޭގެ އިތުރުން ފޮރިން މިނިސްޓަރު ވިދާޅުވީ ރާއްޖެ އިން ޗައިނާ އަށް ދަރާފައިވާ މިންވަރު އަދި ސާފުނުވާ ކަމަށެވެ. މިއަދުގެ ބައްދަލުވުމުގައި ޝާހިދު ވަނީ ޜާއްޖޭގެ އައު ސަރުކާރުން ގުޅުން ބަދަހި ކުރުމުގެ ގޮތުން ބައެއް ޤައުމުތަކަށް ދަތުރުތަކެއް ކުރަން ހަމަޖެހިފައިވާކަންވެސް ހާމަކުރައްވައިފައެވެ.
އެގޮތުން އަންނަ ހަފުތާގައި ސަރުކާރުގެ ވަފުދެއް އިންޑިއާ އަށް ދިއުމަށް ހަމަޖެހިފައިވާ ކަމަށާއި ޗައިނާ، ޔޫއޭއީ އަދި ސައޫދީ އަރަބިއްޔާ އަށް ވެސް ކުރިއަށް އޮތް ދުވަސްތަކުގައި ސަރުކާރުގެ ވަފުދުތައް ޒިޔާރަތް ކުރުމަށް ހަަމޖެހިފައިވާ ކަމަށެވެ.
ޝާހިދު ވިދާޅުވީ ރައީސް އިބްރާހީމް މުޙައްމަދު ޞާލިޙުގެ ހާރިޖީ ސިޔާސަތުގެ އެންމެ އިސް ތަނބުތައް ކަމުގައިވާނީ ޑިމޮކްރަސީ އާއި އިންސާނީ ހައްގުތަކާއި ތިމާވެށި ރައްކާތެރި ކުރުމަށް ބައިނަލްއަގްވާމީ ގޮތުން ކުރަމުންދާ މަސައްކަތްތަކުގައި ފުރިހަމަ އަށް ބައިވެރިވެ އެ މަސައްކަތްތަކުގެ އިސް ދައުރެއް އަދާ ކުރަން ފެށުން ކަމަށެވެ.
އެހެންކަމުން އެކަންކަމުގައި ރާއްޖޭގެ ބައިވެރިވުން ދާނީ އިތުރުވަމުން ކަމަށެވެ. ޝާހިދު ވިދާޅުވީ ހަމައެއާއިއެކު ބައިނަލްއަގްވާމީ ސުލްހައަށް ކުރާ މަސައްކަތްތަކުގައި ރާއްޖެއިން ބައިވެރިވާނެ ކަމަށާއި ހާއްސަ ގޮތެއްގައި އިންޑިއާ ކަނޑުގެ ސުލްހަ އާއި ހަމަޖެހުމަށް ކުރަމުންދާ މަސައްކަތްތަކުގައި އަވައްޓެރި ގައުމުތަކާއެކު ރާއްޖޭގެ ބައިވެރިވުން އިތުރުކުރާނެ ކަމަށެވެ.
