ޚިޔާލު ފާޅުކުރުމުގެ ނަމުގައި ނުވަތަ ޢިލްމީ ދިރާސާ ކުރުމުގެ ނަމުގައިވިޔަސް އިސްލާމް ދީނަށް ނުވަތަ މި ދީނުގެ މާތް ރަސޫލާ މުޙަންމަދު ސައްލަﷲ ޢަލައިހި ވަސައްލަމަ އަށް ބަދުބަހެއް ނުވަތަ މަލާމާތެއް ރައްދުކުރުމަކީ ބަލައިގަނެވޭނެ ކަމެއް ނޫން ކަމަށް ކެންދޫ ދާއިރާގެ މެންބަރު ޢަލީ ޙުސައިން ވިދާޅުވެއްޖެއެވެ.
ޤާނޫނީ ވަކީލުކަންވެސް ކުރައްވާ ޢަލީ ޙުސައިން މިފަދަ ބަސްފުޅެއް ވިދާޅުވެފައި މިވަނީ ރާއްޖެއިން އިސްލާމް ދީން ފުހެލަން މަސައްކަތްކުރާ އެމްޑީއެންއިން އިސްލާމް ދީނަށާއި ރަސޫލް (ޞޢވ) އަށް ފުރައްސާރަކޮށް ބަދުބަސް ބުނި މައްސަލައިގައި ގިނަ އަދަދެއްގެ ބައަކު ކަންބޮޑުވުން ފައުޅުކުރަމުން ގެންދާ ވަގުތެއްގައެވެ.
