މިދިއަ އަހަރު ބޭއްވި ރިޔާސީ އިންތިޚާބު ނިމި ނަތީޖާ އިއުލާނުކުރުމުން ގެންނަން އުޅުނު އިންޤިލާބް ފޭލިކޮށްލުމުގައި ސިފައިންނާ ފުލުހުން އަދާކުރި ދައުރަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ތައްރީފް ކުރައްވައިފި އެވެ.
މިއަހަރުގެ ރިޔާސީ ބަޔާން އިއްވަވައިދެއްވަމުން ރައީސް އިބްރާހީމް މުޙައްމަދު ޞާލިޙް މިއަދު ވިދާޅުވީ ރައްޔިތުންގެ ނިންމުން އެގޮތުގައި ދަމަހައްޓައި، ޑިމޮކްރެސީ ނެގެހެއްޓުމުގައި ސިފައިން އަދާކުރި ޤައުމީ ވާޖިބާއި އުފުލި ޒިންމާ، މި ފުރުޞަޠުގައި ވެސް ފާހަގަކުރައްވާ ކަމަށެވެ.
"މި ރާއްޖޭގެ ސިޔާދަތީ މިނިވަންކަމުގެ މައިބަދަ ކަމުގައިވާ ދިވެހި ސިފައިންނަކީ، ސިފަވަންތަ އަޚްލާޤާއި، ޒަމާނީ ޢިލްމާއި ހުނަރު ލިބިފައިވާ، ހުޝިޔާރު ޤާބިލު ބަޔަކަށް ހެދުމަށްޓަކައި، މިއަހަރުވެސް މުހިންމު މަސައްކަތްތަކެއް ކުރެވޭނެ. އަދި ދިވެހި ސިފައިންގެ ޢަސްކަރީ ޤާބިލުކަން އިތުރުކުރުމަށް ބޭނުންވާ، ތަޢުލީމާއި ތަމްރީނުގެ އިތުރު ފުރުޞަތުތައް ހޯދައިދެވޭނެ.
މިދިޔަ އަހަރަކީވެސް، ރާއްޖޭގެ މިނިވަންކަމާއި އަމަންއަމާންކަން ޤާއިމުކުރުމުގައި، ދިވެހި ސިފައިންނާއި ފުލުހުން މުހިންމު މަސައްކަތްތަކެއް ކުރި އަހަރެއް. މިނިވަން އިންޞާފުވެރި ރިޔާސީ އިންތިޚާބެއް ބޭއްވުމުގައި، އެ ދެ މުއައްސަސާގެ ދައުރު ވަރަށް މުހިންމު. ރައްޔިތުންގެ ނިންމުން އެގޮތުގައި ދަމަހައްޓައި، ޑިމޮކްރެސީ ނެގެހެއްޓުމުގައި ސިފައިން އަދާކުރި ޤައުމީ ވާޖިބާއި އުފުލި ޒިންމާ، މި ފުރުޞަޠުގައިއަޅުގަނޑު ފާހަގަކުރަން." ރައީސް އިބްރާހީމް މުޙައްމަދު ޞާލިޙް ވިދާޅުވިއެވެ.
