ކުރިމިނަލް ކޯޓާއި ހަވާލުވެ ހުންނެވި ގާޒީ އާދަމް އާރިފް ޑްރަގް ކޯޓަށް ބަދަލުކޮށް އިތުރު ދެ ގާޒީއަކު ކްރިމިނަލް ކޯޓަށް ބަދަލުކުރަން ޖުޑިޝަލް ސާވިސް ކޮމިޝަން (ޖޭއެސްސީ) އިން މިއަދު ނިންމައިފި އެވެ.
ޖުޑީޝަލް ސާވިސް ކޮމިޝަން (ޖޭއެސްސީ) އިން ބުނީ، ދަށު ކޯޓުތަކުގެ ފަނޑިޔާރުން އެއް ކޯޓުން އަނެއް ކޯޓަށް ބަދަލު ކުރުމުގެ އުސޫލުގެ ދަށުން ސުޕްރީމް ކޯޓުން ހުށަހަޅާފައިވުމުން ތިން ގާޒީއަކު ބަދަލު ކުރަން ނިންމާފައިވާ ކަމަށެވެ. އޭގެ ތެރޭގައި ސިވިލް ކޯޓުގެ ގާޒީ ހުސައިން ފާއިޒް ރަޝީދު ކުރިމިނަލް ކޯޓަށް ބަދަލުކުރުމާއި ޑްރަގް ކޯޓުގެ ގާޒީ އަލީ ރަޝީދު ކުރިމިނަލް ކޯޓަށް ބަދަލުކުރުން ހިމެނެއެވެ. އަދި އަދާމް އާރިފް ޑްރަގް ކޯޓަށް ބަދަލުކުރުން ވެސް ހިމެނޭކަމަށް ޖޭއެސްސީއިން ވަނީ ބުނެފަވެ.
މި ބަދަލު ގެނެސްފައިވަނީ މިއަދު ބޭއްވި ޖުޑިޝަލް ސާވިސް ކޮމިޝަން (ޖޭއެސްސީ) ބައްދަލު ވުމުގެއެވެ.
ގާޒީ އަރިފް އަކީ ބޮޑެތި ބައެއް މައްސަލަތައް ބެއްލެވި ފަނޑިޔާރެކެވެ. އޭގެތެރޭގައި ނޫސްވެރިޔާ އަހުމަދު ރިލްވާން ގެއްލުނު މައްސަލަ އާއި ސިޔާސީ ބައެއް ބޭފުޅުންގެ މައްސަލަތަކާއި މަރުގެ ބޮޑެތި ބައެއް މައްސަލަތައް ވެސް ހިމެނެއެވެ. މީގެ އިތުރުން ޖުމްހޫރީ ޕާޓީގެ ލީޑަރު ގާސިމް އިބްރާހިމްގެ މައްސަލަ ބެއްލެވީ ވެސް ގާޒީ އަރިފްއެވެ.
