ރާއްޖޭގެ ފަތުރުވެރިކަމުގެ ސިނާއަތުގައި ހިމެނޭ ހުރިހާ ތަންތަނުގެ ޚިދުމަތްތައް ބެލުމަށް ހަތް މަސް ދުވަހުގެ ތަހުގީގީ ޕްރޮގްރާމެއް ޓޫރިޒަމް މިނިސްޓްރީން މާދަމާ ފަށަން ނިންމައިފިއެވެ.
މިކަމާއި ގުޅޭގޮތުން ޓޫރިޒަމް މިނިސްޓްރީ ގައި މިއަދު ބޭއްވި ނޫސްވެރިންގެ ބައްދަލުވުމެއްގައި ވާހަކަފުޅު ދައްކަވަމުން ޓޫރިޒަމް މިނިސްޓަރ އަލީ ވަހީދު ވިދާޅުވީ، މާދަމާއިން ފެށިގެން ސެޕްޓެމްބަރ މަހުގެ 7 ވަނަ ދުވަހުގެ ނިޔަލަށް ހިންގޭ މިތަހުގީގުގައި، ޓޫރިޒަމް ދާއިރާއާއި ގުޅޭ ތަންތަނުން ދެމުން އަންނަ ޚިދުމަތްތަކާއި އެކިއެކި ކަންބޮޑުވުންތައް ވެސް ތަހުގީގު ކުރުމަށް ނިންމާފައިވާ ކަމަށެވެ.
"އެގޮތުން ރާއްޖޭގެ ރިސޯޓުތަކާއި، ގެސްޓް ހައުސްތަކާއި އަދި ސަފާރީތައް ވެސް އިންސްޕެކްޓްކޮށް އެތަންތަނުގައި ހުރި ސަލާމަތީ ކަންކަމާއި ރައްކާތެރިކަމާއި އަދި ހުރިހާ ފެސިލިޓީއެއް އިންސްޕެކްޓް ކުރެވޭނެ. މީގެ އިތުރުން މުވައްޒަފުންގެ ހުރި ކަންބޮޑުވުންތަކާއި ޝަކުވާތައް ވެސް ބަލައި ޖުމްލަ ގޮތެއްގައި ހުރި ހުރިހާ މައްސަލައެއް އިންސްޕެކްޓު ކުރެވޭނެ" ޓޫރިޒަމް މިނިސްޓަރ ވިދާޅުވެފައިވެއެވެ.
މިނިސްޓަރ އަލީ ވަހީދު ވިދާޅުވި ގޮތުގައި މިތަހުގީގަކީ މޯލްޑިވްސް އެސޯސިއޭޝަން އޮފް ޓޫރިޒަމް އިންޑަސްޓްރީ (މަޓީ) އާއި، ޓޫރިޒަމް މިނިސްޓްރީގެ އިތުރުން ފުލުހުންނާއި ސިފައިން ގުޅިގެން ހިންގާ ތަހުގީގެކެވެ. އަދި މިތަހުގީގުގައި ފަތުރުވެރި ކަމުގެ ވިޔަފާރި ހިންގާ ހުރިހާ ތަނަކަށް ޒިޔާރަތް ކުރާނީ އެމިނިސްޓްރީ އާއި ފުލުހުންނާއި ސިފައިންގެ ޓީމެކެވެ.
މިދިޔަ ޖެނުއަރީ މަހު ރާއްޖޭގެ އެކި ކަންކޮޅުތަކުގައި ބައެއް ފަތުރުވެރިންނަށް ހިތާމަވެރި ހާދިސާތަކާއި ކުރިމަތިވެފައިވާކަން ފާހަގަ ކުރައްވަމުން މިނިސްޓަރ ވިދާޅުވީ، އެހާދިސާތަކުގައި އެއްވެސް ފަރާތަކުން އިހުމާލުވެފައިވާކަން ވެސް މިތަހުގީގުގައި ބައްވާނެ ކަމަށާއި، އެއްވެސް ފަރާތަކުން އިހުމާލުވެފައިވާނަމަ އެފަރާތަކާއިމެދު އަޅަން ޖެހޭ ފިޔަވަޅު އަޅުއްވާނެ ކަމަށެވެ. އެހެންނަމަވެސް ބައެއް ފަތުރުވެރިން ހަމަ ގުދުރަތީ މަރަކުން ވެސް މަރުވެފައިވާކަން ފާހަގަ ކުރައްވާ މިނިސްޓަރ އަލީ ވަހީދު އެދިލެއްވީ އެފަދަ ކަންކަން ބޮޑު ނުކުރެއްވުމަށެވެ.
ފަތުރުވެރިކަމުގެ ދާއިރާގައި ހިމެނޭ ހުރިހާ ކަންކަން ތަހުގީގު ކުރުން މާދަމާ ފެށޭއިރު، މިތަހުގީގު އެންމެ ފުރަތަމަ ފެށުމަށް ހަމަޖެހިފައިވަނީ ބޮޑު ތިލަދުންމަތިންނެވެ.
