މިހާރަކަށް އައިސް ކޮންމެވެސް ބައަކަށް އެންމެ ބޮޑަށް އުނދަގޫވެގެން އުޅޭކަމަށް ވަނީ މިސްކިތަތަކުގެ ތާޅަފިލީގެ އަޑު ގަދަވުމެވެ.
މި ޝަކުވާއަށް ބަލާއިރު ބަނގީގެ އަޑު މަޑުކުރުމަކީ އެއްގޮތަކަށްވެސް ކުރެވިގެންވާނެ ކަމެއް ނޫނެވެ. ދެން އޮތީ ދަރުސް އަޑެވެ. ކޮންމެ ދަރުސަކީ ޓީވީ ތަކުން ލައިވް ކުރާ ދަރުސްތަކެއް ނޫނެވެ. ލައިވް ކުރަނީ ވަރަށް މަދު ދަރުސެކެވެ. އެހެންކަމުން ދަރުސްގެ އަޑު ތާޅަފިލިން ފޮނުވުމުން ދަރުސް އަޑުއަހަން މިސްކިތަށް ނާދެވޭ އަނހެނުންނާއި އެނޫންވެސް އެފަދަ ހާލަތުގައި ތިބޭ ގިނަ ބައަކަށް ގޭގައި ތިބެގެން ދަރުސް އަޑު އެހުމުގެ ފުރުޞަތު ލިބެއެވެ. އަދި ގިނަ ބައަކު އެގޮތަށް ގޭގައި ތިބެގެން ދަރުސް އަޑު އަހަން ބޭނުންވެސް ވެއެވެ.
މިސްކިތްތަކުގައި ދަރުސް ދެނީ އާންމު ގޮތެއްގައި ގިނަވެގެން 30 ވަރަކަށް މިނިޓަށެވެ. ނަމަވެސް ސިޔާސީ ހަރަކާތަތްކަށް ރޭގަނޑު 8.00 އިން 12.00 އަށް އަޑުގަދަ ކުރާ ބޭނުންކުރެއެވެ. ގޭގޭގައި ޕާޓީ ބާއްވައި އުފާކުރަން ވެސް މުޅި ރޭގަނޑު އަޑުގަދަކުރާ ބޭނުން ކުރެއެވެ. މިކަންކަމުން މީހުންނަށް މާބޮޑަށް އުނދަގޫވެއެވެ.
ޤާނޫނަށް ބަލައިފިނަމަ ދިވެހި ރައްޔިތުންނަކީ މުސްލިމުންނެވެ. ވީމާ ދަރުސެއްގެ އަޑު އިވުމަށް ނުއެދޭ މީހަކު ހުރެގެން ނުވާނެއެވެ. ނަމަވެސް ރައްޔިތުންނަކީ އެއް ޕާޓީއެއްގެ ބައެއް ނޫނެވެ. ސިޔާސީ 20 ވަރަކަށް ފިކުރު މި ޤައުމުގައި މިހާރު އެބަ އޮތެވެ. އެހެންކަމަށްވާއިރު އެއް ފިކުރުގެ މީހުން އަނެއް ފިކުރުގެ އަޑުއަހަން ބޭނުމެއް ނުވާނެއެވެ. އަނެއް ފިކުރުގެ އަޑު އިވުމުން އުނދަގޫވެސް ވާނެއެވެ.
މިމައްސަލައިގައި ކަންބޮޑުވާ މީހުން ބުނަނީ ދަރުސްތަކުގެ އަޑު ހަމަ އެކަނި މިސްކިތްތަކުގައި ތިބޭ ބައަކަށް އިވޭވަރަށް މަޑުކުރާނަމަ ޢާޓިފިޝަލް ބީޗް ސަރަހައްދު، އަލިމަސް ކާނިވާ ސަރަހައްދު އަދި އެނޫންވެސް ތަންތަނުގައި ބާއްވާ ސިޔާސީ ބައްދަލުތަކުގެ އަޑުވެސް އިވެންޖެހޭނީ އެއަޑު އަހަން ގޮސް ތިބި ބައަކަށް އެކަނި ކަމަށެވެ. ސަރަހައްދުގެ އެއްވެސް ގެއަކަށް އިވިގެން ނުވާނެއެވެ. އަދި މަގުމަތިން ދާ މީހުންނަށްވެސް އިވިގެން ނުވާނެ ކަމަށެވެ.
