މިއަހަރުގެ ބަރަކާތްތެރި ރަމަޟާނަ މަހުގެ ދުވަސްތައް ފެށެން އެންމެ 2 މަހެއަހައި ދުވަހަށް ކައިރިވީއެވެ. ވީމާ ރޯދަ ހިފުމާއި ރޯދަ މަހު ކުރަންޖެހޭ އަޅުކަންތަކުގެ ވާހަކަތައް ދައްކަން ފަށަން ވެއްޖެއެވެ. އެހެނީ ރަމަޟާން މަހަކީ އަޅުކަމުގެ ޢީދެވެ. މުސްލިމުންނަށް އެންމެ ފައިދާހުރި ދުވަސްތަކާއި ރޭތައް ދާދިގާތްވުމަކީ ކުޑަ ނިޢްމަތެއް ނޫނެވެ.
މިސްތަކުންނޭވެ. ރަމަޟާން މަހަށް ވަރަށް ފުރިހަމައަށް ތައްޔާރުވާން ޖެހޭނެއެވެ. ހިތާއި ނަފްސް ޠާހިރުކޮށް ދިރުން ގެންނަން ޖެހޭނެއެވެ. ރޯދަ، ރޯދައިގެ ގޮތުގައި ހިފޭނީ އެއިރުންނެވެ. ރަމަޟާން މަހުގެ ހުރިހާ ރޯދަތަކެއް ﷲ ތަޢާލާ އެންގެވި ގޮތުގައި ހިފައިފި މީހަކަށް ނުވަތަ އެކަމުގެ ޤާބިލުކަން ލިބުނު މީހަކަށް އަހަރުގެ ބާކީ އޮތް 11 މަހުގެ ރޭތަކުގައި ﷲ ތަޢާލާ ޙަރާމް ކުރެއްވެވި އެއްވެސް ކަމެއް ނުކޮށް ހުރެވޭނެއެވެ.
މިސާލެއްގެ ގޮތުން ބުނެލަމެވެ. ދުވާލު ރޯދައަށް ހުންނައިރު އަހަރެމެންގެ ކުރިމަތީގައި ފެން ހުރެއެވެ. ބައެއް ދުވަސް ދުވަހު ހޫނު ގަދަވެ ކަރު ހިއްކުން އިތުރުވެ ކަޅި ހުއްޓޭވަރުވެސް އެބަވެއެވެ. ބައެއް ފަހަރު ކުޑަދޫ ބޭރަށް ނުކުންނަން އުޅޭހެންވެސް ހީވާ ހާލަތު އާދެއެވެ. ނަމަވެސް އަހަރެމެން ހަމަ އެންމެ ފެން ތިއްކެއްވެސް ނުބޮމުއެވެ. ކީއްވެގެން ހެއްޔެވެ؟ ﷲ ތަޢާލާގެ އަމުރުފުޅަށް ކިޔަމަންތެރިކަން އަދާކުރަން ބޭނުންވާތީއެވެ. އެހެންކަމަށްވާއިރު އަހަރުގެ ބާކީ އޮތް 11 މަސް ދުވަހު ބަނގުރާ ނުބައި ނުހުރެވެންވީ ކީއްވެގެން ހެއްޔެވެ؟ ޢާންމުގޮތެއްގައި ރޭގަނޑު ލިބިގަންނަ އެ އުފާ އެއީ ޙަޤީޤަތުގައި ތިމާގެ އަމިއްލަ ހަލާކުކަން ޤަބޫލުކޮށް އެ ނުބައި އަމަލާއި ދުރު ނުވެނެންވީ ކީއްވެގެން ހެއްޔެވެ؟ ބަނގުރާ ޙަރާމް ކުރެއްވެވީ ވެސް ހަމަ ރޯދައަށްހުރެ ފެން ނުބުއިމަށް އަމުރުފުޅު ކުރެއްވެވި ﷲ ތަޢާލާއެވެ. މިއީ އެންމެ މިސާލެކެވެ. މިފަދަ ކިތަންމެ ގިނަ މިސާލުތަކެއްވެސް ދެއްކިދާނެއެވެ.
ރަމަޟާން މަސް ކައިރިވަމުން އަންނާތީ އެއްބައަކު އުފާކުރެއެވެ. ރަމަޟާން މަސް އަވަހަށް އައުމަށް އެދި ކެތްތެރިކަމެއް ނެތި އިންތިޒާރުކުރެއެވެ. ނަމަވެސް އަނެއް ބައަކު ތިބެނީ ކަންބޮޑުވެފައެވެ. ރޯދަ ހިފަން ޖެހޭނެތީއެވެ. ރޯދަ ނުހިފި ނަމަވެސް އެހެން މަސްތަކުގައިހާ ފަސޭހައިން ދުވާލުގެ ވަގުތުތަކުގައި ކާން ބޯން ނުލިބޭނެތީއެވެ.
ލޮބުވެތި އަޚުންނާއި އުޚުތުންނޭވެ. ފަހުން މިބުނި މީހުންގެ ތެރޭގައި ނުހިމެނޭށެވެ. ކުރިން ބުނި މީހުންގެ ތެރޭގައި ހިމެނޭށެވެ. އެ ސާބިތުކަން، އެ ތަޤްވާވެރިކަން ތިބާ ލިބިގެންފިނަމަ އެކަމަށްޓަކައި ތިބާ އުފާކުރާނެ ދުވަސް އޮތީ ދާދި ގާތުގައެވެ. އެދުވަސް ކުރިމަތިވާނީ ހަމައެކަނި މަރުވުމުން ކަމަށް ވެސް ހިނުކުރާށެވެ! ހަމަ މިދުނިޔޭގައިވެސް ކުރިމަތިވެދާނެއެވެ.
ކުރިއަށް އޮތްތަނުގައި ﷲ ތަޢާލާގެ ވާގިފުޅާއިއެކު މައުޟޫގައި އިތުރަށް ވާހަކަ ދައްކާނަމެވެ.
- މުފްތީ މެންކުގެ ދަރުސަކުން
