ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް، މިނިސްޓްރީ އޮފް ހަޔަރ އެޑިޔުކޭޝަންގެ މިނިސްޓަރުގެ ނައިބުގެ މަޤާމަށް ދެ ބޭފުޅުން ޢައްޔަނު ކުރައްވައިފިއެވެ.
މިގޮތުން ޢައްޔަން ކުރެއްވި އެއްބޭފުޅަކީ ނ. ފޮއްދޫ އާޝީޔާމަންޒިލް އިސްމާޢީލް ޒަބީޙެވެ. އިސްމާޢީލް ޒަބީޙަކީ ޔުނިވަރސިޓީ އޮފް ވެސްޓް އޮފް އިންގްލެންޑުން މާސްޓަރސް އޮފް ބިޒްނަސް އެޑްމިނިސްޓްރޭޝަން ހާސިލުކުރައްވައިފައިވާ ބޭފުޅެކެވެ. އިސްމާޢީލް ޒަބީޙަކީ މަންދު ކޮލެޖްގައި ލެކްޗަރަރ ގެ މަޤާމާއި އިންޓަނޭޝަނަލް ޗެއިން މޯލްޑިވްސް ޕްރައިވެޓް ލިމިޓެޑްގައި މެނޭޖިން ޑިރެކްޓަރުކަމާއި، ވިލެޖް ކޮންސްޓްރަކްޝަން ޕްރައިވެޓް ލިމިޓެޑްގައި މާކެޓިން މެނޭޖަރުކަން އަދާކުރައްވާފައިވާ ބޭފުޅެކެވެ. މީގެ އިތުރުން ޒަބީޙް ވަނީ ރައީސުލްޖުމްހޫރިއްޔާގެ އޮފީހުގައި ސީނިއަރ ރިސަރޗް އޮފިސަރގެ މަޤާމްވެސް ފުރުއްވާފައެވެ.
މިނިސްޓްރީ އޮފް ހަޔަރ އެޑިޔުކޭޝަންގެ މިނިސްޓަރުންގެ ނައިބުގެ މަޤާމަށް ދެން އައްޔަނުކުރައްވާފައި ވަނީ ގަލޮޅު މަންބަޢުގެ ޢާއިޝަތު ޝަފިނާއެވެ. ޢާއިޝަތު ޝަފިނާއަކީ ސްރީލަންކާގެ ޔުނިވަރސިޓީ އޮފް ކޮލަމްބޯ އިން މާސްޓަރ އޮފް ޑިވެލޮޕްމަންޓް ސްޓަޑީޒް ހާސިލުކުރައްވާފައިވާ ބޭފުޅެކެވެ. އަދި މިހާރު ދަނީ ސްރީލަންކާގެ ޔުނިވަރސިޓީ އޮފް ޕެރަޑެނިޔާ އިން ޕީ.އެޗް.ޑީ އިން ސޯޝިއޮލޮޖީ އަށް ކިޔަވާ ވިދާޅުވަމުންނެވެ. ޢާއިޝަތު ޝަފިނާ ވަނީ އެޑިއުކޭޝަން ފަސްޓް މޯލްޑިވްސްގައި ކޮންސަލްޓަންޓް/ ރީޖަނަލް މެނޭޖަރ ކަމާއި، މަންދުކޮލެޖްގައި ބިއުރޯ ޗީފްގެ މަޤާމުވެސް އަދާކުރައްވާފައެވެ.
