ވިލާގެ އެކި ކުންފުނިތަކަށް ދޫކޮށްފައިވާ ފަސް ރަށެއްގެ އެއްބަސްވުން 2015 ގައި ސަރުކާރުން ބާތިލްކުރި މައްސަލައިގައި ވިލާއާ އެއްކޮޅަށް 2018 ވަނަ އަހަރުގެ އޭޕްރީލް މަހުގެ 18 ވަނަ ދުވަހު ސުޕްރީމް ކޯޓުން ކޮށްފައިވާ ހުކުމް ތަންފީޒު ކުރުމުގެ މަސައްކަތް ފަށާފައިވާ ކަމަށް ޓޫރިޒަމް މިނިސްޓްރީން ބުނެފިއެވެ.
ޓޫރިޒަމް މިނިސްޓްރީން މިއަދު ނެރުނު ބަޔާނެއްގައި ބުނެފައިވަނި ވިލާގެ މައްސަލަ ސުޕްރީމް ކޯޓުން ނިންމިގޮތަށް ކަމާބެހޭ ވުޒާރާތަކާއެކު ތަންފީޒު ކުރުމުގެ މަސައްކަތް ފަށާފައިވާ ކަމަށެވެ. އަދި ސެޓްލްމެންޓް ދަށުން ގޮތެއް ނިންމާނީ ރައީސް އޮފީހާއި ބަންޑާރަނައިބްގެ އޮފީހާއި ފިނޭންސް މިނިސްޓްރީއާ ޕްލޭނިން މިނިސްޓްރީގެ ލަފައާ މަޝްވަރާއާއެކު ކަމަށްވެސް މިނިސްޓްރީން ބުންޏެވެ.
Ministry's Press Release 4 February 2019https://t.co/RSKylU2xL5 pic.twitter.com/wQAZE3yzNP
— Ministry of Tourism (@TourismMv) February 4, 2019
ރިސޯޓް ހެދުމަށް ވިލާ ގްރުޕް ގެ ކުންފުނިތަކަށް ދޫކުރި ބައެއް ރަށްތަކާއި ފަޅުތައް އަތުލި މައްސަލާގައި ސިވިލް ކޯޓުން ވަނީ ވިލާއާ އެއްކޮޅަށް ހުކުމް ކޮށްފައެވެ. ނަމަވެސް ހައި ކޯޓުން އެ ހުކުމްތައް ބާތިލްކުރުމުން މައްސަލަ ވިލާ އިން ސުޕްރީމް ކޯޓުގައި އިސްތިއުނާފް ކުރިއެވެ. ސުޕްރީމް ކޯޓުން ނިންމީ ހައި ކޯޓުގެ ހުކުމްތައް ބާތިލްކޮށް، ސިވިލް ކޯޓުގެ ހުކުމް ރަނގަޅު ކަމަށް ނިންމައިފައެވެ.
މިހުކުމާ ގުޅިގެން މޯލްޑިވްސް އިންލަންޑް ރެވެނިއު އޮތޯރިޓީ (މީރާ) އަށް ދައްކަން އެންގި 2.9 ބިލިއަން ރުފިޔާ، ވިލާ ގްރުޕުން ދައްކަން ނުޖެހޭކަން ވަނީ ސާބިތުވެފައެވެ.
