ހޮސްޕިޓަލިޓީ ދާއިރާއިން މީހުން ތަމްރީނު ކުރުމަށް ވިލާ ކޮލެޖުން ޔުނިވާސަލް ފައުންޑޭޝަނާއެކު އެއްބަސްވުމެއްގައި މިއަދު ސޮއެ ކޮށްފިއެވެ.
ވިލާ ކޮލެޖުގައި ބޭއްވުނު ރަސްމިއްޔާތެއްގައި މިއެއްބަސްވުމުގައި ވިލާ ކޮލެޖުގެ ފަރާތުން ސޮއެ ކުރެއްވީ އެކޮލެޖްގެ ރެކްޓަރ ޑރ.އަހްމަދު އަންވަރު އެވެ. އަދި ޔުނިވަރސަލް ފައުންޑޭޝަންގެ ފަރާތުން ސޮއެ ކުރެއްވީ ޔުނިވަރސަލް ފައުންޑޭޝަންގެ ޕްރެޒިޑެންޓް އިޔާޒް ވަހީދެވެ.
ޔުނިވަރސަލް ފައުންޑޭޝަންއާއި ވިލާ ކޮލެޖު ގުޅިގެން 2017 އިން ފެށިގެނެ ޑިސްކަވަރ ހޮސްޕިޓަލިޓީގެ ނަމުގައި ހޮސްޕިޓަލިޓީ ދާއިރާއިން ސެޓެފިކެޓް ލެވެލް 3 ފެންވަރަށް ދަރިވަރުން ތަމްރީން ކުރުމުގެ ޕްރޮގްރާމެއްދަނީ ހިންގަމުންދާ ކަމަށް ވިލާ ކޮލެޖުން ބުނެފައިވެއެވެ. އެގޮތުން މި ޕްރޮގްރާމްގެ ދަށުން މިހާހިސާބަށް 40 އަށް ވުރެ ގިނަ ދަރިވަރުން ވަނީ ތަމްރީން ކުރެވިފައެވެ.
ޑިސްކަވަރ ހޮސްޕިޓަލިޓީ އަކީ ޔުނިވަރސަލް އިން ސްޕޮންސަރކޮށްގެން ހޮސްޕިޓަލިޓީ ދާއިރާއިން ހިލޭކިޔެވުމަށް ހުޅަވާލާ ޕްރޮގްރާމެކެވެ. މި ޕްރޮގްރާމްގެ ތެރެއިން ފުޑް އެންޑް ބެވަރެޖް ސާވިސަސް، ހައުސް ކީޕިނގް، އަދި ފްރަންޓް އޮފީސް ފަދަ ދާއިރާތަކުން ތަމްރީން ދިނުން ހިމެނެއެވެ.
ކޯހުގެ ބައިވެރިން ތިއަރީ ބައިިތައް ވިލާ ކޮލެޖުގައި ފުރިހަމަކުރުމަށްފަހު ޢަމަލީތަޖުރިބާ ފުރިހަމަ ކުރާނީ ޔުނިވަރސަލްގެ ރެޒޯޓްތަކުގައި ތިބެގެން ކަމަށް އެކޮލެޖުން ބުނެފައިވާއިރު، ކޯހުގެ މުއްދަތުގައި ކޯހުގެ ބައިވެރިންނަށް މަހަކު 3000 ރުފިޔާގެ އެލަވަންސްއެއް ދެވޭނެ ކަމަށް ވެސް ބުނެފައިވެއެވެ.
ހަތަރު މަސްދުވަހުގެ މުއްދަތަށް ހިންގާ މި ޕްރޮގްރާމްގައި ބޭސިކް އެޑިއުކޭޝަން ފުރިހަމަކޮށްފައިވާ ކޮންމެ މީހަކަށްވެސް ބައިވެރިވެވޭނެއެވެ. ކޯހުގެ ބައިވެރިން ހޮވޭނީ ސެލެކްޝަން އިންޓަވިއު އަކަށް ފަހުގައި ކަމަށް ވިލާ ކޮލެޖުން ބުނެފައިވެއެވެ.
ޖޫން މަހު ކިޔެވުން ފެށުމަށް ހަމަޖެހިފައިވާ މި ޕްރޮގްރާމްގައި ބައިވެރިވުމަށް ފޯމް ހުށަހެޅުމުގެ އެންމެ ފަހުގެ ތާރީޚަކީ 30 މާރޗް 2019 އެވެ. މި ޕްރޮގްރާމްގެ ދަށުން ނިންމި ހުރިހާ ދަރިވަރުންވެސް މި ދާއިރާއިން ވަޒީފާ އަދާ ކުރަމުންދާކަން ވިލާ ކޮލެޖުން ފާހަގަ ކުރެއެވެ.
