ފުވައްމުލަކު ސިޓީއަށް ޗުއްޓީ ހޭދަކުރުމަށް އައިސްގެން އުޅޭ ފަރަންސޭސި ވިލާތުގެ ފަތުރުވެރިއެއް ކަމަށްވާ ޖެސިކާ ނަމަކަށް ކިޔާ ފަތުރުވެރިއަކު އިސްލާމްވެއްޖެއެވެ.
ވީޑިއޯ އާއިއެކު މިޚަބަރު ޢާންމުކޮށްފައިވާ ފުވައްމުލަކު ޓައިމްސް އިން ބުނެފައިވަނީ ޖެސިކާއަކީ ޑައިވިންގ ކުރުމަށް އެއް ފަހަރަށްވުރެ ގިނައިން ފުވައްމުލަކު ސިޓީއަށް ޒިޔާރަތް ކޮށްފައިވާ ފަތުރުވެރިއެއް ކަމަށް ފުވައްމުލަކު ސިޓީގެ ޑައިވިންގ ސެންޓަރ ހިންގާ ތަނުގެ މުވައްޒަފެއް ”ފުވައްމުލަކު ޓައިމްސް” އަށް މައުލޫމާތު ދެއްވާފައިވާ ކަމަށެވެ.
ޖެސިކާ އިސްލާމްވުމުގެ ގޮތުން ޝަހާދަތް ކިޔައި އިސްލާމް ދީން ގަބޫލުކުރީ ފުވައްމުލަކު ސިޓީގައި ހަރަކާތްތެރިވާ ދީނީ ޖަމްޢިއްޔާއެއް ކަމަށްވާ ގާޑިއަން އެސޯސިއޭޝަންގެ އިސް މެންބަރުންގެ ޙާޟިރުގައެވެ. މިގޮތުން އޭނާ އިސްލާމް ދީން ގަބޫލުކޮށް ޝަހާދަތުގެ ދެ ކަލިމަ ކިޔައި ހިތުން އެކަން ގަބޫލުކުރީ ދީނީ ޢިލްމުވެރިއެއް ކަމަށްވާ ޝައިޚް ސިނާނުގެ ޙާޟިރުގައެވެ. އަދި އިސްލާމް ދީން ގަބޫލުކުރުމަށްފަހު ދީނަށް ޝައުގުވެރިވި ގޮތް ވަރަށް ތަފްސީލްކޮށް އޭނާ ކިޔާ ދިނެވެ.
މިރަސްމިއްޔާތުގައި ޝައިޚް ސިނާނު އާއި އައިޑިއަލް ސްކޫލްގެ ޕްރިންސިޕަލް މުޙައްމަދު ޙުސައިން އަދި އެސޯސިއޭޝަންގެ އިސް މެންބަރު ވަނީ އިސްލާމްދީނާއި ބެހޭ މައުލޫމާތު އޭނާއަށް ކިޔައިދީ ދީނީ ގޮތުން ނަސޭހަތްތެރިވެފައެވެ.ފުވައްމުލައް ޓައިމްސް އަށް މައުލޫމާތު ލިބިފައިވާ އިސްލާމްވި ފަތުރުވެރިޔާ އުޅެނީ ފުވައްމުލަކު ކުއްޖަކާ ރައްޓެހިވެގެންނެވެ. އަދި ވަރަށް އަވަހަށް ކައިވެނި ކުރުމަށް ދަނީ ތައްޔާރު ވަމުންނެވެ.
ޖެސިކާ އިސްލާމްވި ވީޑިއޯ މީސް މީޑިއާގަޔާއި އަދި ގާޑިއަން އެސޯސިއޭޝަންގެ ޕޭޖުގައި ދަނީ ދައުރުވަމުންނެވެ.
--ޚަބަރާއި ފޮޓޯ އަދި ވީޑިއޯ ފުވައްމުލަކު ޓައިމްސް ދީނީ މުހިންމު ލިޔުމަކަށްވާތީ މިއަދުނޫހުގައި ޝާއިޢުކޮށްފައި ވާނީ ފުވައްމުލަކު ޓައިމްސްގައި ޝާއިޢުކޮށްފައިވާ އަސްލާ އެއްގޮތަށެވެ.
ފުވައްމުލަކު ޓައިމްސް އިން ޚަބަރު ވިދާޅުވުމަށް:
https://fuvahmulahtimes.com/2019/02/5742
ޚަބަރުގެ ވީޑިއޯ ބެއްލެވުމަށް:
https://www.facebook.com/GuardianAssociationGA/videos/286312645321697/?t=50
