އަވަށްޓެރި ޝްރީ ލަންކާގެ މިނިވަން ދުވަހުގެ ހަރަކާތްތައް ޝަރަފުވެރި ކޮށްދެއްވުމަށް ރައީސް އިބްރާހިމް މުޙައްމަދު ޞާލިޙު އެޤައުމަށް މިއަދު ފުރާވަޑައިގެންފިއެވެ.
މާދަމާ ފާހަގަ ކުރާ ލަންކާގެ މިނިދުވަހުގެ ހަރަކާތްތަކުގައި ބައިވެރިވުމަށް ރައީސް ޞާލިޙު ވަޑައިގެންނެވީ އެޤައުމުގެ ރައީސް މައިތުރިޕާލާ ސިރިސޭނާގެ ދައުވަތަކަށެވެ.
ރައީސް އިބްރާހިމް މުހައްމަދު ސޯލިހް އަންނަ އަންގާރަ ދުވަހުގެ ނިޔަލަށް ލަންކާ އަށް ކުރައްވާ މުރަސްމީ ދަތުރުފުޅުގައި، އެ ގައުމުގައި ދިރިއުޅޭ ދިވެހިންނާ މިއަދު ހަވީރު ބައްދަލުކުރައްވާނެ އެވެ. އަދި ދެ ގައުމުން ގުޅުން ބަދަހި ކުރާނެ ދާއިރާތަކާ މެދު ލަންކާ ސަރުކާރާއެކު ރައީސް މަޝްވަރާތައް ވެސް ބާއްވާނެ އެވެ.
މިއީ، މިދިޔަ އަހަރުގެ ނޮވެމްބަރު 17 ގައި ވެރިކަމާ ހަވާލުވެވަޑައިގެންނެވި ފަހުން ރައީސް އިބްރާހިމް މުހައްމަދު ސޯލިހް ލަންކާ އަށް ކުރައްވާ ފުރަތަމަ ރަސްމީ ދަތުރުފުޅެވެ. ނަމަވެސް އަމިއްލަފުޅު ދަތުރުފުޅެއްގައި އެމަނިކުފާނު ވަނީ މިދިޔަ މަހުގެ ކުރީކޮޅު އެ ގައުމަށް ވަޑައިގެންފަ އެވެ.
