ދަރުސްތައް ބާއްވަން ހުއްދަ ހޯދަން މިހާރު ފަސޭހަ ކަމަށާއި ނަމަވެސް ބޭނުންވަނީ ލިޔެވިފައިވާ އުޞޫލަކުން އެ ފަސޭހަކަން ކަށަވަރުކުރެވެން ކަމަށް ރާއްޖޭގައި ދަރުސް ދެއްވާ އެންމެ އިސް ބައެއް ޢިލްމުވެރިން ވިދާޅުވެއެވެ.
ބައެއް ޢިލްމުވެރިން ވިދާޅުވާ ގޮތުގައި މިސްކިތްތަކުގައި ނުވަތަ ޢާންމުތަންތަނުގައި ދަރުސް ދެއްވާނަމަ އެކަން އިސްލާމިކް މިނިސްޓރީއަށް އަނގައިލަން ޖެހުމަކީ އެއްވެސް މައްސަލައެއް ނޫނެވެ. ނަމަވެސް ހަރުދަނާ ނިޒާމެއްގެ ތެރެއިން އެކަން ކުރެވޭނެ ރަނގަޅު އުޞޫލެއް ލިޔެވިފައި އޮތުން ވަރަށް މުހިންމެވެ.
"މިހާރު ލިޔެވިފައި އޮންނަ އުޞުލުގައިވާ ގޮތުން ދަރުސެއް ދޭނަމަ ލިޔުމަކުން ހުއްދަ ހޯދަން އެބަ ޖެހޭ. ރަށްރަށުގެ ކައުންސިލްތަކުގައި ތިބެނީ އެއް ފިކުރެއްގެ ކައުންސިލަރުންނެއް ނޫން. އެހެންވެ ޤަޞްދުގައި ވެސް އެބަ ހުރަސް އަޅާ. އެބަ ބުނޭ ދަރުސް ދެވޭނީ ލިޔުމުން ހުއްދަ ލިބިގެންނޭ. މިއަދު ބުރާސްފައްޗޭ. ލިޔުމެއް ނުހޯދޭނޭ. އެހެންވީމާ ހަފްތާ ބަންދުގައި ދަރުހެއް ނުދެވޭނޭ. މިމައްސަލަ ކުރިމަތިވެ އަމިއްލަ ރަށުގައިވެސް ބައެއް ޢިލްމުވެރިންނަށް ދަރުސް ނުދެއްވިފައި އެބަހުރި. ރައްޔިތުން ބޭނުންވޭ ދަރުސް ދޭން. ދަރުސް އަޑުއަހަން. ނަމަވެސް ލިޔެކިޔުންތައް ބަހަނާއަކަށް ހަދައި ކައުންސިލުން ހުއްދަ ނުދިނީމާ އެކަން ކުރެވޭނެ ގޮތެއް ނޯވޭ!"
ބައެއް އިލްމުވެރިން ފާހަގަކުރައްވާ ގޮތުގައި ސިލްސިލާކޮށް ކުރިއަށް ގެންދާ ދަރުސްތައް ކުރިއަށް ގެންދަން މަހަކު އެއްފަހަރު ހުއްދަ ނަގަން ޖެހުމަކީވެސް ތަކްލީފެކެވެ. އެހެންކަމުން ސިލްސިލާތައް ކުރިއަށް ގެންދާ މިސްކިތްތަކުގައި އިތުރު ހުއްދައަކާއި ނުލައި އެކަން ދާއިމީ ގޮތަކަށް ކުރިއަށް ގެންދެވޭނެ މަގެއް ފަހިވުމަކީ ވަރަށް މުހިންމު ކަމެކެވެ.
ޤަވާއިދުން ކުރިއަށް ގެންދާ އެންމެ ދުވަސްވީ ދަރުސް ޕްރޮގްރާމަކީ ބަންޑާރަ މިސްކިތުގައި ކުރިއަށް ގެންދާ ޕްރޮގްރާމެވެ. ކުރީގެ ބައެއް ސަރުކާރުތަކުގައި 30 އަހަރުވެފައިވާ އެ ޕްރޮގްރާމަށް ވެސް ހުރަސް އަޅައި ހުއްޓުވައި އިތުރު ހުއްދަ ނަގަން ޖައްސުވަން މަސައްކަތް ކޮށްފައިވާ ކަމުގެ މައުލޫމާތު ވެސް ވަނީ ލިބިފައެވެ.
ބައެއް ޢިލްމުވެރިން ވިދާޅުވާ ގޮތުގައި ޤަވާއިދެއް ހަދައި ޢިލްމުވެރިންނަށް ދަތިތައް ކުރުމަތިކުރުވީ މިދިއަ އަހަރު އެއިރުގެ ވެރިކަމުން ކުރަމުން ގެންދިއަ އިސްލާމް ދީނާއި ޚިލާފް ކަންކަން، ޚާއްޞަކޮށް ރައީސް ޔާމީން ދައްކަވަމުން ގެންދެވި ލާދީނީ ވާހަކަތަކަށް ޢިލްމުވެރިން ރައްދު ދެއްވާތީ އެކަން ހުއްޓުވުމަށެވެ. އެއިރުވެސް މިނިސްޓަރު ޑރ. ޒިޔާދު ރުހިވަޑައިގަންނަވާ ބޭފުޅުންނަށް މެސެޖެއް ކޮށްލުމުން ހުއްދަ ދެއްވި ކަމަށާއި ނަމަވެސް ރުހިވަޑައި ނުގަންނަވާ އިލްމުވެރިއަކު ދަރުސެއްދެއްވާނަމަ ހުއްދަ ހޯއްދަވަން އެތައް ހުރަސްތަކެއް ކުރިމަތިކުރުވި ކަމަށެވެ.
"ވީމާ އަޅުގަނޑުމެން މިއެދެނީ އިސްލާމިކް މިނިސްޓްރީން ހުއްދަ ދެއްވާފައިވާ ހުރިހާ އިލްމުވެރިންނަށްވެސް އެއް އުޞޫލަކުން ލުއިފަސޭހަ ގޮތަކަށް ކަންކަން ކުރެވޭނެ ގޮތެއް ލިޔެކިޔުމުން ހަމަޖެހިފައި އޮންނަން. މާނައަކީ ލިޔެވި ފެންނަން އޮންނަ ޤަވާއިދެއްގެދަށުން ކުރިއަށް ގެންދެވޭނެ ގޮތެއް ހަމަޖެހުން."
މިފަދަ ކަންކަމަށް މަގުފަހިކޮށްދިނުމުގެ ނަމުގައި ކުރީގެ އިސްލާމިކް މިނިސްޓަރު ޑރ. ޒިޔާދުގެ މިނިސްޓަރުކަމުގައި ދީނީ ޢިލްމުވެރިން ހިމެނޭ ވައިބަރ ގްރޫޕެއްވެސް ހެދިއެވެ. ނަމަވެސް ސަރުކާރުގެ ލާދީނީ ސިޔާސަތުތަކަށް ބައެއް އިލްމުވެރިން ގްރޫޕުގައި ފާޑުވިދާޅުވުމުން ހުރިހާ އިލްމުވެރިން ގްރޫޕުން ބޭރުކޮށްލިކަމަށްވެސް ބައެއް ޢިލްމުވެރިން ވަނީ ވިދާޅުވެފައެވެ.
ބައެއް ޢިލްމުވެރިން މިމޭރުމުން ވިދާޅުވަމުން ގެންދަވާއިރު މިސަރުކާރުގެ އިސްލާމިކް މިނިސްޓަރު ޑރ. އަހްމަދު ޒާހިރު ވިދާޅުވެފައިވަނީ ރައީސް ޔާމީނުގެ ވެރިކަމުގައި ހަދާފައިވާ ޤަވާއިދުތައް އިޞްލާޙް ކުރައްވައި ޢިލްމުވެރިންނަށް ފަސޭހަކަމާއިއެކު ކަންކަން ކުރެއްވޭނެ މަގުފަހިކޮށްދެއްވާނެ ކަމަށެވެ. އަދި ކުރީގެ ޤަވާއިދުތައް އިޞްލާޙް ކުރުމަށް މިހާރުވެސް އިސްލާމިކް މިނިސްޓްރީން މަސައްކަތް ފަށާފައިވާ ކަމަށާއި ޤަވާއިދު އިޞްލާޙް ކުރެވެންދެން މިހާރު ހުރި ޤަވާއިދުތަކަށާއި އުޞޫލުތަކަށް އަމަލުކޮށްދެއްވުން އެދިވަޑައިގަންނަވާ ކަމަށެވެ.
