ޓޫރިސް ރިޒޯޓްތައް ތަރައްޤީކޮށްފައިވާ ރަށްތަކުން ބިމު ކުލީގެ ގޮތުގައި ލިބޭ ފައިސާ އެ އަތޮޅަކަށް ދިނުމަށާއި އަދި ރިޒޯޓްތަކުގެ ބެޑް ޓެކްސްއަށް ލިބޭ ފައިސާ ދައުލަތަށް ބޭނުންކުރުމާއިމެދު މަޝްވަރާތަކެއް ކުރެވެމުން އަންނަ ކަމަށް ރައީސް އިބްރާހީމް މުޙައްމަދު ޞާލިޙް ވިދާޅުވެއްޖެއެވެ.
ރައީސް އިބްރާހީމް މުޙައްމަދު ޞާލިޙް ވިދާޅުވީ ލާމަރުކަޒީ ޤާނޫނަށް ޚިޔާލު ހޯދަން ދަރުބާރުގޭގައި ރޭ ކުރިއަށް ގެންދިއަ ފޯރަމްގައި ދެކެވުނު ވާހަކަތަކުން ފާހަގަކުރެއްވުނު މުހިއްމު ބައެއް ކަންތައްތަކުގެ ތެރޭގައި، އެންމެ ބޮޑަށް ފާހަގަކުރެއްވެނީ، މާލީ ފުދުންތެރިކަން ބޭނުންވާ ވާހަކަ ކަމަށާއި އެއީ މައިގަނޑު އެއް ކަންތައް ކަމަށެވެ.
ރައީސް އިބްރާހީމް މުޙައްމަދު ޞާލިޙްގެ ވާހަކަފުޅުން:
"ދެން މާލީ ފުދުންތެރިކަން ދިނުމާ ބެހޭގޮތުން ވާހަކަ ދައްކާއިރު، އަޅުގަނޑުމެންގެ ވިސްނުމެއް އެބައޮތް. އަތޮޅުތަކަށް ލިބޭ އާމްދަނީގެ ބައެއް، އަތޮޅުތަކަށް ދިނުން. މިއީ ކެމްޕެއިންގެ ތެރޭގައިވެސް އަޅުގަނޑުމެން ދައްކާފައި އޮތް ވާހަކައެއް. އިރާދަކުރެއްވިއްޔާ، އެކަން ތަންފީޒުވެގެންދާނެ. ތިޔަބޭފުޅުން ދެއްވަންވީ އޭގެ ޚިޔާލު. މިސާލަކަށް، އަޅުގަނޑުމެންގެ ތެރޭގައި އުޅޭ އެއް ޚިޔާލެއް. ރިޒޯޓްތައް ހަދަން ދީފައި މިހުރި ރަށްރަށް. އޭގެތެރެއިން ލޭންޑް ރެންޓް. މިއީ އަޅުގަނޑުމެން އިހަށްދުވަހު ގެނައި ޚިޔާލެއް. ލޭންޑް ރެންޓް ދެމާ ހިނގާށޭ އަތޮޅުތަކަށް. އެއީ އަތޮޅުތަކުގައި ހުރި ރަށްރަށެއް. ދެން މި ނަގާ ބެޑް ޓެކްސް ހިނގާށޭ ދައުލަތަށް ސީދާ ސެންޓްރަލް ގަވަރންމަންޓަށް ނަގަން.
އެހެންވީމާ، އެ އަތޮޅެއްގައި ހުރި ރަށެއްގެ ބިން ކުއްޔަށް ދޫކޮށްގެން ލިބޭ ފައިސާ ދޭންވީނޫންހޭ އެ އަތޮޅަކަށް ތަރައްޤީ ކުރަން. މިހިރީ ގެންގުޅެވޭ ޚިޔާލުތައް. އަދި ވަކިގޮތެއް ނުނިމި މިހުރީ.
ދެން މީގައި ނުކުންނަ އެއް މައްސަލައަކީ، މިސާލަކަށް، އަރިއަތޮޅު. އެހެންކަމަށްވަންޏާ، އަރިއަތޮޅަށް ވަރަށްގިނަ ފައިސާ ލިބޭނެ. އަރިއަތޮޅުގެ ހުރިހާ ރަށެއް ހުރީ ރިޒޯޓްތައް ހަދަންދީފައޭ. އެހެންވީމާ، އަރިއަތޮޅުގެ ރަށްތަކުގެ ލިބޭ އާމްދަނީ އެކީ އަރިއަތޮޅަށްދޭ ކަމަށްވަންޏާ، ކޮބައިހޭ ފުވައްމުލައް. ކޮބައިހޭ އައްޑުއަތޮޅު. ކޮބައިހޭ އަދި ހއ. އަތޮޅު. މިކަހަލަ އެތައް މަޝްވަރާތަކެއް ކޮށްގެން މީގައި ގޮތެއް މި ނެރެންޖެހެނީ."
އަންހެނުން ކުރިއަރުވާ ކޮމިޓީއަށް މުސާރަ ލިބޭ ގޮތް ހެދުމަށް ވެސް ރައީސް އިބްރާހީމް މުޙައްމަދު ޞާލިޙް ވަނީ ތާއީދު ކުރައްވައިފައެވެ.
ރައީސް އިބްރާހީމް މުޙައްމަދު ޞާލިޙްގެ ވާހަކަފުޅުން:
"ދެން އަންހެނުން ކުރިއަރުވާ ކޮމިޓީގެ ވާހަކަ، އަނެއް ކަމަކަށް. ވަރަށް ރަނގަޅު ޚިޔާލެއް ދެންމެ ޙުސައިން އާދަމް އެ ހުށަހެޅުއްވީ ދޮގެއްތޯ. އަންހެނުންގެ ކޮމިޓީތަކަށް މުސާރަ ލިބޭގޮތަށް ހަދާފައި، އިދާރީ އޮނިގަނޑެއް ހަދައިފިއްޔާ، އެ ކުރިއަށްދާނޭ. އަނެއްގޮތަކީ ކައުންސިލަށް، މިހާރު އޮތްގޮތަށް، ކައުންސިލަށް ވަކިވަރަކަށް އަންހެނުންނަށް އާދެވޭގޮތަށް އޮތުން. ކޮންމެގޮތެއްވިޔަސް، މިހާރު މި ހިނގާ ނިޒާމު މަސައްކަތެއް ނުކުރެޔޭ. އެއީ އަޅުގަނޑުމެންނަށް އެނގޭ ކަމެއް. ރަށްރަށަށް. އެހެންވީމާ، އެއަށް ބަދަލުގެންނަން އެބަޖެހޭ. އެކަހަލަ ވަރަށްގިނަ ޚިޔާލުތަކެއް އަތުވެއްޖެ.
ދެން ހުޅުމީދޫ. މުޅިން އެހެން ވިސްނުމެއް އެ ގެންގުޅުއްވަނީ. އެއީވެސް ހަމަ ވިސްނަން ރަނގަޅު ވާހަކައެއް، އެބޭފުޅުން އޭގައި ދައްކަވަނީ. އަޅުގަނޑުމެން މި ޤާނޫނު އިޞްލާޙު ކުރެވެމުންދާއިރުގައި، ސިޓީއެއް ހަދާއިރުގައި، ހަމައެކަނި އާބާދީއަށްތޯ ބަލާނީ، ނޫނީވިއްޔާ އެއްފަސްވެފައި އޮތް ތަނަކަށްތޯ ބަލާނީ. މިއީ ވިސްނަންޖެހޭ ކަމެއް.
މިސާލަކަށް، މިހާރު ނުކުމެގެން މިއުޅޭ އެއް މައްސަލައަކީ ކުޅުދުއްފުށި. ސިޓީއަކަށް ބަދަލުވަނީ. އާބާދީ ހަމަވެއްޖެ. ސިޓީއަކަށް ބަދަލުވާއިރުގައި، އަތޮޅުވެރިކަން ކުރާ ރަށަށްވަނީ ކިހިނެއްތޯ. ކޮންތާކަށްތޯ ދަނީ؟ ދެން ކައުންސިލަރުން ހޮވާނީ ކިހިނެއްތޯ؟ މިކަހަލަ އެތައް އެތައް ކަމެއް އެބައުޅޭ.
އެހެންވީމާ، ތިޔަބޭފުޅުންގެ މަޝްވަރާ އަޅުގަނޑުމެން މިކަމުގައި މިހޯދަނީ. އިރާދަކުރެއްވިއްޔާ މި ލިބޭ މަޝްވަރާތަކުގެ އަލީގައި، މި ކަންތައްތަކަށް ޙައްލު ލިބޭނެ.
ވަރަށް ބޮޑަށް ޝުކުރިއްޔާ!
