އެންމެ ރަނގަޅު ގޮތަކީ ގިނަގިނައިން ރައްޔިތުން ގާތަށް ދާން ޖެހުން ކަމަށް ޤަބޫލުފުޅު ކުރައްވާ ކަމަށް ވިދާޅުވެ ރައީސުލްޖުމްހުރިއްޔާ ކަމުގެ ދައުރުވެސް މިހާރު އޮންނަ 5 އަހަރަށްވުރެ ކުރުކުރައްވަން ތައްޔާރަށް ހުންނެވިކަން ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ޙާމަކުރައްވައިފިއެވެ.
އެމަނިކުފާނު މިކަން ހާމަ ކުރެއްވީ ލާމަރުކަޒީ ޤާނޫނަށް ގެންނަން ބޭނުންވާ އިޞްލާޙް ތަކަށް ރައްޔިތުންގެ ޚިޔާލު ހޯދުމަށް ރޭ ދަރުބާރުގޭގައި ކުރިއަށް ގެންދިއަ ފޯރަމް ނިންމައިލުމުގެ ގޮތުން ދެއްކެވި ވާހަކަފުޅުގައެވެ.
"އަނެއް ކަމަކަށް އަޅުގަނޑަށް ފާހަގަކުރެވުނު، ދައުރުގެ ވާހަކަ. ދެ އަހަރުގެ ބަދަލު، ތިން އަހަރުގެ ބަދަލުގައި ފަސް އަހަރަށް ބަދަލުކުރާ ވާހަކަ. ދެން އަޅުގަނޑު ހަމަ ހިތަށްއަރާ އެއްޗެއް އިނގޭތޯ. އިންތިޚާބުކުރާ މީހުން އަވަސް އަވަހަށް ރައްޔިތުންގެ ކައިރިއަށް ދިޔުން ނޫންތޯއޭ ރަނގަޅީ، ގިނަދުވަހު ތިބުމަށްވުރެ. ދެންމެ މާޅޮހުގެ ކައުންސިލްގެ ރައީސް ވިދާޅުވި، ތިންފަހަރު ހޮވިއްޖައީމޭ. ރަނގަޅަށް މަސައްކަތް ކުރާ ކަމަށްވަންޏާ، އަޅުގަނޑު ހިތުން ރައްޔިތުން ހޮވާނެ. އަޅުގަނޑަށް ފަސް އަހަރު ދިގު، އަޅުގަނޑު ރައީސުލްޖުމްހޫރިއްޔާ ކަމުގައި ހުންނަން. އަޅުގަނޑަށް ރައްޔިތުންގެ މަޖިލީހުގެ ދައުރުވެސް ދިގު، ފަސް އަހަރު. އެއަށްވުރެ އަވަހަށް ރައްޔިތުންގެ ކައިރިއަށް ދާންޖެހޭނެހެން އަޅުގަނޑަށް ހީވަނީ. އަޅެ، މިކަމާ ދޭތެރޭގައި އަދި ވިސްނަވައިލައްވައްޗޭ އިނގޭތޯ. މިއީ އަޅުގަނޑުގެ ޚިޔާލަށް އަންނަ ކަމެއް."
ރައީސް އިބްރާހީމް މުޙައްމަދު ޞާލިޙް ވިދާޅުވީ އެއީ ޤާނޫނުއަސާސީ ލިޔުނުއިރުގައިވެސް މެންބަރުނެގެ މެދުގައި މަޝްވަރާ ކުރެވުނު ކަމަށެވެ. "އަޅުގަނޑުމެންނަށް ދުނިޔޭގެ އެކި ތަންތަނުން ހޯދުނުއިރުގައި، ކައުންސިލްތައް ނުވަތަ ސިޓީތަކުގެ ކައުންސިލްތައް އިންތިޚާބުކޮށްފައި މި ހުންނަނީ ހަމަ އެހާ ކުރުކޮށް. އެއީ ރައްޔިތުންނާ ކައިރިން ޚިދުމަތްދޭ ބައަކަށްވާތީ، އަބަދުވެސް ރައްޔިތުން ކައިރިއަށް ދާން. ތިމަންނާ ކުރީ ރަނގަޅަށްތޯ އަހަން. އަވަސް އަވަހަށް ދިއުން. މިއީ އެއްގޮތް. ދެން އެ ވިދާޅުވަނީ ފަސް އަހަރުގެ ވާހަކަ. އަޅެ މިއާ ދޭތެރޭގައި ވިސްނައިލުން ރަނގަޅުވާނެ." ރައީސް އިބްރާހީމް މުޙައްމަދު ޞާލިޙް ވިދާޅުވިއެވެ.
