"އެއްވެސް މީހަކާމެދު ނިކަމެތިކޮށް ނުދެކޭށެވެ. މިއަދު ނިކަމެތިކޮށް ދެކުނު މީހާގެ ފަރާތުން މާދަމާ އެހީތެރިކަން ބޭނުންވެދާނެއެވެ."
މިއީ ފަޟީލަތުއްޝައިޚް ޢަލީ ޒާހިރު ބިން ސަޢީދު ޤާސިމް ވިދާޅުވެފައިވާ ބަސްފުޅެކެވެ.
އިއްޔެ ވަރަށް އާދައިގެ ވަޒީފާތަކުގައި ތިބި މީހުން މިއަދު ވަރަށް މަތީ މަޤާމްތަކުގައި އެބަ ތިއްބެވެ. އިއްޔެ ވަރަށް ނިކަމެތި ޙާލުގައި އުޅުނު މީހުން މިއަދު ވަރަށް ބޮޑެތި މަހުޖަނުންގެ ގޮތުގައި އެބަ ތިއްބެވެ. ހަމަ އެފަދައިން އިއްޔެ ވަރަށް މަތީ މަޤާމުތަކުގައި ތިބި މީހުން މިއަދު އެތިބީ އެއްވެސް ހައިޞިއްޔަތެއް ނެތިފައެވެ. އިއްޔެ ވަރަށް ބޮޑެތި މަހުޖަނުންގެ ގޮތުގައި ތިބި މީހުން ވަރަށް ބޮޑެތި ދަރަނިވެރިންގެ ގޮތުގައި މިއަދު އެބަތިއްބެވެ.
އެއްވެސް މީހެއްގެ ހާލަތު ބަދަލު ކުރައްވާނީ ކޮން ވަގުތަކުކަން ހަމަ އެއްގޮތަކަށްވެސް ނުއެނގޭނެއެވެ. ހަމަ ވަރަށް ގާތުންފެންނަން ހުރި ދެ މިސާލެކެވެ. އަޙްމަދު އަދީބް މިއަދު އެހުރި ޙާލުގައި ހުންނަން ޖެހޭނެ ކަމަށް ހީކުރެވުނު ހެއްޔެވެ؟ ހިންނަވަރު އިބްރާހީމް މުޙައްމަދު ޞާލިޙް ރާއްޖޭގެ ރައީސުލްޖުމްހޫރިއްޔާކަން ކުރައްވާނެ ކަމަށް އެއްވެސް މީހަކަށް ހީވެސް ކުރެވުނު ހެއްޔެވެ؟ ނަމަވެސް ވަގުތު ޖެހުމުން ޙާލަތު އެވަނީ މުޅިން ބަދަލުވެފައެވެ.
ރާއްޖޭގެ ތަފާތު ދިމާތަކުން މިކަންކަން މިހާރު ވެސް މިގޮތަށް ފެންނަން ހުރުމުން ޝައިޚްގެ މި ބަސްފުޅަކީ ވަރަށް ޙިކްމަތްތެރި ބަސްފުޅެއް ކަމުގައި ޤަބޫލުކުރަން ޖެހެއެވެ.
