ލާމަރުކަޒީ ޤާނޫނު ހެދި ފަހުން ދުވަސްތަކެއް ފާއިތުވެގެން ހިނގައްޖެ ކަމަށާއި، މިއަދު ސަރުކާރުން ބޭނުންވަނީ ރައްޔިތުންގެ ތަޖުރިބާގެ އަލީގައި، ކަންކަން ކުރިއަށްދާ ގޮތާ ބެހޭގޮތުން ރައްޔިތުންގެ ޚިޔާލު ހޯދަން ކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވެއްޖެއެވެ.
އެމަނިކުފާނު މިމޭރުމުން ވިދާޅުވީ ދަރުބާރުގޭގައި މިރޭ ކުރިއަށްދިއަ "ޖަޒީރާ ހޮޅުއަށި" ސިލްސިލާގެ ދެވަނަ ބައްދަލުވުން ފަށްޓަވައިދެއްވުމުގެ ގޮތުން ދެއްކެވި ވާހަކަފުޅުގައެވެ.
ރައީސް ޞާލިޙް ވިދާޅުވީ ލާމަރުކަޒީ ޤާނޫނު އިސްލާހު ކުރުމަށްޓަކައި ރައްޔިތުންގެ މަޖިލީހަށް ހުށަހެޅުމަކީ ސަރުކާރުގެ ފުރަތަމަ 100 ދުވަހުގެ ތެރޭގައި ފުއްދަވަން ވައުދުވެވަޑައިގެންފައިވާ ކަމެއްކަމަށެވެ. އަދި، މިރޭގެ ބައްދަލުވުމުގެ އެންމެ ބޮޑު ބޭނުމަކީ، ލާމަރުކަޒީ ޤާނޫނަށް ސަރުކާރުން ގެންނަން ބޭނުންވާ އިސްލާހުތައް ގެންނެވުމުގައި ރައްޔިތުންގެ ވިސްނުން ހުރި ގޮތް ބެއްލެވުން ކަމަށެވެ. "ތަޖުރިބާއަށް ބަލާއިރު ބައެއް ކައުންސިލުތަކުން ވަރަށް ކާމިޔާބު ކަމާއިއެކު މަސައްކަތް ކޮށްފަ. ބައެއް ކައުންސިލުތަކަށް ވަނީ މަސައްކަތް ނުކުރެވިފަ."
މި ބައްދަލުވުމުގައި ރައީސުލްޖުމްހޫރިއްޔާގެ ނައިބުގެ އިތުރުން ސަރުކާރުގެ ބައެއްވަޒީރުންނާއި އިސް ބޭފުޅުން ބައިވެރިވެވަޑައިގެންނެވިއެވެ
