ކަމެއް ޖެހިއްޖެނަމަ އެކަހެރިވާން ގިނަ ބައަކު ބޭނުންވެއެވެ. އެއީ އެފަދަ ވަގުތުތަކުގައި އެކަހެރިވުމަށް ޝައިޠާނާ ހިތްވަރު ދޭތީއެވެ. އެގޮތަށް ހިތްވަރު ދެނީ ކީއްވެގެންކަން އެނގޭ ހެއްޔެވެ؟ ރަނގަޅަށް ވިސްނައިލާށެވެ.
ޢާއިލީ ދިރިއުޅުމަށް ބަލާއިރު ފިރިމީހާ އާއި މައްސަލައެއް ޖެހިދާނެއެވެ. އެވަގުތު ޝައިޠާނާ އެކަމުގެ ތެރެއަށް ވަންނާނެއެވެ. އެކަހެރިވުމަށް ހިތްވަރުދޭނެއެވެ. އެހެންވެ ކޮޓަރިން ބޭރަށް ނުކުންނަން ވެސް ގިނަ ފަހަރު ބޭނުމެއް ނުވާނެއެވެ.
އެހާލަތުގައި ކޮޓަރީގައި ބަނދުކުރުވުމަށްފަހު ފުރަތަމަވެސް މިޒަމާނުގައި ހިތްވަރު ދޭނީ އަވަސް އަވަހަށް ހިތްވަރުދޭނީ ފޯނު ނެގުމަށެވެ. ފޯނުގައި ހުރި ރައްޓެހި ފިރިހެނުންތަކުގެ ތެރެއިން މީހަކަށް ގުޅައިލުމަށެވެ. ފޯނުގައި އެފަދަ މީހެއްގެ ނަމްބަރު ނެތް ނަމަ މާކުރީގެ ރައްޓެހިންގެ ނަމްބަރުތައް ހަނދާނަށްވެސް ގެނެސްދޭނެއެވެ. ބޭނުމަކީ ކޮބައި ކަމަށް ހެއްޔެވެ؟ ހިލޭ ފިރިހެނަކާއި ގުޅުން އުފައްދުވައި މަގުފުރެއްދުވުމެވެ. ތިއަ ކަނބަލުން ނިކަން ބުނެބަލާށެވެ! މިފަދަ ކަންކަން ތަޖުރިބާ ކުރަން ޖެހިފައި ނުވޭ ހެއްޔެވެ؟ ގިނަ ފަހަރު މިކަންކަމުގެ ތަޖުރިބާ ހިތި ނޫން ހެއްޔެވެ؟
ހަމައެއާއިއެކު މީހަކަށް އެއްވެސް ބާވަތެއްގެ މާޔޫސްކަމެއް ލިބިއްޖެނަމަ ޝައިޠާނާ އެންމެ ބޮޑަށް މަސައްކަތް ކުރުވާނީ އެމީހަކު ކަންނެތް ކުރުވުމަށެވެ. ނަތީޖާއަކަށްވާނީ ނަމާދުކުރުމާއި ކީރިތި ޤްރްއާން ކިޔެވުން ފަދަ އަޅުކަންތައްތަކާއިވެސް ދުރުހެލިވެވުމެވެ. އެފަދަ ހާލަތުގައި ތިމާ އާއި ﷲ ތަޢާލާ އާއި އޮންނަ ގުޅުންތައް ދާނީ ކެނޑިގެންނެވެ.
މީސްތަކުންނޭވެ! އެއްވެސް މީހެއްގެ ހުރިހާ ކަންކަން އަބަދު ހުންނާނީ އެންމެ ފުރިހަމައަކަށް ނޫނެވެ. ހިތްދަތިވާންޖެހޭ ހާލަތުތައް ކޮންމެ މީހަކަށްވެސް މެދުވެރިވާނެއެވެ. އެފަދަ ހާލަތްތަކުގައި އެކަހެރި ނުވާށެވެ. ޢާންމު ދިރިއުޅުން އުޅެން ގަދައަޅައި މަސައްކަތް ކުރާށެވެ! ޛިކްރްކުރުން ގިނަކުރާށެވެ! ޛިކްރްކުރުން ގިނަކުރުމަކީ މިފަދަ މުޞީބާތްތަކުން އަރައިގަތުމަށް އެންމެ ބޮޑަށް ހިތްވަރު ލިބޭ އެއްކަންތަކެވެ. އަދި މުޞީބާތްތަކުން އަރައިގަތުމަށް އެންމެ ފަސޭހައިން މަގުފަހިވާވެސް ސަބަބެކެވެ.
ނިކަން ވިސްނައިބަލާށެވެ. ޖަންގަލީގައި ހިނގަނިކޮށް ނޫނީ މަގުމަތީގައި ހިނގަނިކޮށް ގައަށް ކައްޓެއް ހެރުނު ނަމަވެސް އެކަމުގައި އުފުލަންޖެހޭ ތަކްލީފަކީ ތިބާގެ ފާފަތައް ފޮހެވުމަށް މެދުވެރިވާ ސަބަބެކެވެ. ވީއިރު ޙަޔާތުގައި މެދުވެރިވާ ބޮޑެތި މުޞީބާތްތަކުގެ ސަބަބުން އުފުލަންޖެހޭ ތަކްލީފްތަކުގެ ސަބަބުން ގިނަ ފާފަތަކެއް ފޮހެވިގެންދާނެ ކަމަށް އުންމީދު ނުކުރަންވީ ކީއްވެގެން ހެއްޔެވެ؟
ކޮންމެ މިޞީބާތެއްވެސް ކުރިމަތި ކުރައްވަވަނީ އިމްތިޙާމް ކުރެއްވެވުމަށެވެ. އެހެންކަމުން މުޞީބާތެއް ކުރިމަތިވާހިނދު ޝައިޠާނާ ބުނާ ގޮތަށް ކަންކަން ކުރެވޭ މީހުންނަކީ އިމްތިޙާނުން ފެއިލްވާ މީހުންވެ. ފާސްވާނީ މުޞީބާތް ކުރިމަތި ކުރެއްވެވި ﷲ ތަޢާލާ އެންގެވި ގޮތަށް އަމަލުކުރުމުންނެވެ. ދެގޮތް ވެސް ވަނީ އަހަރެމެންގެ އަތްމަތީގައެވެ. އެމީހަކު ބޭނުން ގޮތެއް ޚިޔާރުކުރަން ﷲ ތަޢާލާ ވަނީ ދޫކޮށްލައްވަވައިފައެވެ.
- އިސްލާމީ ތިލަފަތުގެ ދަރުސަކުން
