"އަދި ތިބާ، ބޮޑާވެގެން ބިމުގައި ހިނގައި ނުއުޅޭށެވެ! ހަމަކަށަވަރުން، ތިބާއަށް ބިންގަނޑު ފޫވައްޓައެއް ނުލެވޭނެއެވެ. އަދި (އިސްކޮޅު ދިގުކަމުން) ފަރުބަދަތަކާ ހަމައަށް ތިބާއަކަށް ނުފޯރާނެއެވެ.) (އަލްއިސްރާ- 37)
މިއީ ކުރީގެ އިސްލާމިކް މިނިސްޓަރު، އޯއައިސީގެ ސެކެޓްރީ ޖެނެރަލްގެ ސްޕެޝަލް އެޑްވައިޒަރ ޑރ. މުޙައްމަދު ޝަހީމް ޢަލީ ސަޢީދު ޓްވީޓް ކުރައްވާފައިވާ އާޔަތެކެވެ. އިތުރު ތަފްޞީލު ދެއްވަވާފައި ނެތުމުން މަޤްޞަދު އޮޅުމެއް ނުފިލައެވެ.
މިދުވަސްވަރަކީ ބައެއް މީހުންނަށް ބޮޑެތި މަޤާމުތައް ލިބި އަދި ބައެއް ޕާޓީތަކަށް ވެރިކަމުގެ ބާރުތައް ލިބުމުން އެކަމަށް ބޮޑާވެ ކިބުރުވެރިވެ ބާރާއި ނުފޫޒު ފޯރުވަމުން ގެންދާ ދުވަސްވަރެކެވެ. ކަނޑުގައި ބޮޑު މަސް ކުދި މަސް ކާ އުޞޫލުން ވެސް ކަންކަން ކޮށް ބަސް ބުނަމުން ގެންދާ ދުވަސްވަރެކެވެ.
އެހެންކަމުން އިރްޝާދު ދެއްވާފައި އެވަނީ ﷲ ތަޢާލާ ނިޢްމަތެއް ދެއްވެވި ނަމަވެސް ބޮޑާވެ ކިބުރުވެރި ނުވުމަށާއި އަދި ކިތަންމެ ބާރުގަދަ ކަމަށް ހީކުރި ނަމަވެސް ބޭނުންހައި ކަމެއް ނުކުރެވޭނެ ކަމާއި އެންމެ ބާރުވެރި ފަރާތަކީ ﷲ ތަޢާލާކަން އަބަދުވެސް ހަނދާނުގައި ބެހެއްޓުމަށާއި މާ ބޮޑެތި ބާރުތަކެއް ލިބިފައިވާ ކަމަށް ޤަބޫލު ކުރެވުނު ނަމަވެސް ﷲ ތަޢާލާގެ ކުޅަދުންވަންތަކަމާއި ގާތްވެސް ނުކުރެވޭނެކަން ޤަބޫލުކުރުމަށް ކަމަށް ބެލެވެއެވެ.
