ލިޔުނީ: ޒިދާން މުޙައްމަދު
ޖެނުއަރީ 27ން 31 ގެ ނިޔަލަށް އދ. ދިގުރަށުސްކޫލްގެ އަށް ޓީޗަރަކު ރ.ވާދޫސްކޫލަށް ޒިޔާރަތްކޮށް ވާދޫސްކޫލްގައި މަލްޓިގްރޭޑަށް ކިޔަވައިދެމުން ގެންދާ ކްލާސްތައް އޮބްޒާވްކޮށް އެ ސްކޫލުގައި މިކަމުގެ ޢަމަލީ ތަޖުރިބާ ހޯދުމުގެ މައިދާނީ ދަތުރެއްފަށައިފިއެވެ.
މިދަތުރުގައި، ކްލާސްތައް އޮބްޒާވުކުރުމުގެ އިތުރުން މަލްޓިގްރޭޑްކޮށް ކިޔަވައިދިނުމަށް ޔުނިޓްޕްލޭން ހެދުމާއި، ލެސަން ޕަލޭން ކުރުމާއި، އެކްޓިވިޓީ ޑިޒައިން ކުރުމާއި، ޑިފެރެންސިއޭޓެޑް އިންސްޓްރަކްސަން ދެގްރޭޑް އެއްކޮށްގެން ގެންދާނެ ގޮތުގެ ތަމްރީންތައް ހޯދަމުން ގެންދާކަމަށް ވާދޫސްކޫލުން ހާމަކުރެއެވެ.
ވާދޫސްކޫލަކީ މިވަގުތު ރާއްޖޭގައި މަލްޓިގްރޭޑްކުރެވިފައިވާ 44 ސްކޫލްގެ ތެރެއިން އެއްމެ ރަނގަޅަށް މި މޮޑެލްއަށް ރާއްޖޭގައި ކިޔަވައިދޭ އެއްސުކޫލެވެ. ވާދޫސްކޫލްގެ ޕްރިންސިޕަލް އިސްމާޢީލް ނަސީރު ހާމަކުރައްވާ ގޮތުގައި މިހާރުގެ ގައުމީ މަންހަޖުގެ ތެރެއިން އެއް ކީސްޓޭޖެއްގައި މަލްޓިގްރޭޑަށް ކިޔަވައިދިނުން ޑިޒައިންކޮށް ކިޔަވައިދިނުމަކީ ދަތިކަމެއް ނޫންކަމުގައެވެ.
އަދި މިހާރުގެ ގައުމީ މަންހަޖާއި ސިލަބަސްތަކަކީ މަލްޓިގްރޭޑްކޮށް ކިޔަވައިދެވޭގޮތަށް ޑިޒައިންކުރެވިފައިވާ މަންހަޖެއްކަމުގައެވެ. ހަމަ އެހެއްމެ، އާބާދީ މަދުވުމުގެ ސަބަބުން ޝާމިލްކުރުން ކްލާސްތަކުގައި ނުގެންދެވޭނެ ސްކޫލްތަކަށް އެއްމެ ރަނގަޅު އެއްމޮޑެލް އަކީ މަލްޓިގްރޭޑް ކަން އިސްމާޢީލް ނަސީރު ވިދާޅުވިއެވެ.
މި ފަހަކަށް އައިސް ރާއްޖޭގެ ބައެއް ސްކޫލްތަކުގައި މަލްޓިގްރޭޑަށް ކަންބޮޑުވުން ފާޅުކުރަމުން ދިޔަކަމުގައި ވީނަމަވެސް، ވާދޫސްކޫލްގެ ޕްރިންސިޕަލް ހާމަކުރައްވާ ގޮތުގައި އެ ސްކޫލުގެ މޮނޮގްރޭޑަށް ވުރެ މަލްޓި ގްރޭޑް ދަރިވަރުންގެ ކޮންޕިޓެންސީއާއި ކޮންޓެންޓްގެ ފެންވަރު ރަނގަޅެވެ. އަދި ވާދޫސްކޫލަކީ މަލްޓިގްރޭޑާއި ގުޅިގެން މިހާތަނަށް ޝާއިރުކުރެވިފައިވާ ގިނަ ދިރާސާތަކުގެ އަލީގައި އެކަންކުރަމުންގެންދާ ސްކޫލުކެވެ.
