ޓޫރިޒަމް މިނިސްޓްރީގެ ހުރިހާ މުވައްޒިފުންނަށް ފަތަން ދަސްކޮށްދިނުމުގެ ޕްރޮގްރާމެއް މިއަހަރުތެރޭގައި ހިންގަވާނެ ކަމަށް ޓޫރިޒަމް މިނިސްޓަރު ޢަލީ ވަޙީދު ވިދާޅުވެއްޖެއެވެ.
ޗަމްޕާ ސެންޓްރަލް ހޮޓަލުގައި ނޫސްވެރިންނަށް މައުލޫމާތު ދެއްވަމުން ޢަލީ ވަޙީދު މިއަދު ވިދާޅުވީ ޕްލާސްޓިކާއި ދުރަށް ދިއުމަށް މަސައްކަތްކުރާ ފަދައިން ގެނބިގެން މަރުވުން ފަދަ ހާދިސާތައް ކުރިމަތިވިއަ ނުދިނުމަށްވެސް މަސައްކަތް ކުރަން ޖެހިފައިވާ ކަމަށެވެ.
ޢަލީ ވަޙީދު ވިދަޅުވީ ހަދާ ޤާނޫނުތަކަކުން މިބާވަތުގެ ކަންކަން ހިނގުން ނުހުއްޓުވޭނެ ކަމަށާއި ހުއްޓުވޭނީ ކޮންމެ މީހަކުވެސް، ކޮންމެ މުއައްސަސާއަކުންވެސް އެކަމަށް އިސްނަގައި އަމިއްލައަށް މަސައްކަތްކޮށްގެން ކަމަށެވެ.
އެންވަޔަރަންމަންޓް މިނިސްޓަރު ޑރ. ޙުސައިން ރަޝީދު މިއަދު ވިދާޅުވީ ދަރިވަރުންނަށް އަމާޒުކޮށްގެން ކޮންމެ އަހަރަކުވެސް ފަތަން ދަސްކޮށްދިނުމުގެ ޕްރޮގަރާމްތައްވެސް ހިނަގާ ކަމަށާއި ނަމަވެސް އެކަށީގެންވާ ގޮތެއްގައި ދަރިވަރުންނަށް ފަތަންދަސްކޮށް ދެވިފައި ނުވާ ކަމަށެވެ. އެހެންކަމުން މިފަދަ ޕްރޮގްރާމްތައް މިހާރަށްވުރެ ފުރިހަމައަށް ހިންގަން ޖެހިފައިވާކަން ފާހަގަކުރައްވާ ކަމަށެވެ.
