އޭނާއަކީ އަމިއްލަ މަސައްކަތުން ލިބޭ އާމްދަނީން އަނބިދަރިންނާއި ޢާއިލާ ގޮވައިގެން މާލޭގައި ދިރިއުޅެމުން އަންނަ މީހެކެވެ. އާމްދަނީއަށް މަހަކު 30000 ރުފިޔާވަރު ލިބެއެވެ. ނަމަވެސް ދިރިއުޅޭ ތަނުގެ ކުއްޔަށް އެއިގެ ތެރެއިން މަހަކު 20000 ރުފިޔާ ދައްކަން ޖެހޭތީ ދިރިއުޅުމަށް ބޭނުން ކުރަން ލިބެނީ އެންމެ 10000 ރުފިޔާއެވެ.
އޭނާގެ މަންމަގެ ލޮލުގެ ބައްޔަކަށް ފަރުވާކުރާތާ 4 ވަރަކަށް އަހަރު ވީފަހުން ޑޮކްޓަރު ލަފާދިނީ ޚާއްޞަ އޮޕަރޭޝަނެއް ކުރުމަށެވެ. ނަމަވެސް އެ އޮޕަރޭޝަން އެންމެ ރަނގަޅު ފެންވަރުގައި ރާއްޖެއިން އަދި ކުރެވެން ނެތުމުން ލަފާދީފައިވަނީ ބޭރު ޤައުމަކަށް ގޮސް އޮޕަރޭޝަން ކުރުމަށެވެ.
އެ އޮޕަރޭޝަނަކީ ކޮންމެވެސް ފެންވަރެއްގައި ރާއްޖެއިން ކުރެވޭ އޮޕަރޭޝަނަކަށްވާތީ އާސަންދަ ލިބޭނެ ގޮތެއް ނުވިއެވެ. އާސަންދަ ނުލިބުނު ނަމަވެސް އޭނާ ބޭނުންވީ އެންމެ ރަނގަޅު ފެންވަރުގައި މަންމަގެ އޮޕަރޭޝަން ކުރުމަށެވެ. އެންމެ ތުއްތު އިރުންސުރެ އޭނާއަށް އެންމެ ގިނައިން ބަލައި ޚިދުމަތް ދީފައިވާ މަންމަގެ ލޮލުގެ އޮޕަރޭޝަން އެންމެ ފުރިހަމައަށް ނޫނީ ނުކުރުމަށެވެ.
ބޭރު ޤައުމަކަށް މަންމަ ގޮވައިގެން ބޭސް ފަރުވާއަށް ދާނެ އެއްވެސް ފައިސާއެއް އެނާގެ އަތުގައި ނެތުމުން އޭނާ ދިއައީ އެކަމަށް މަގުފަހިކޮށްދެއްވެވުން އެދި ﷲ ތަޢާލާއަށް ދުޢާ ކުރަމުންނެވެ. ކޮންމެ ނަމާދެއްގެ ފަހުގައެވެ. ދަމުނަމާދުގެ ފަހުގައެވެ.
މިދިއަ ނޮވެމްބަރު މަހުގެ 18 ވަނަ ދުވަހު ޕްރައިވެޓް ނަމްބަރަކުން އޭނާއަށް ގުޅިއެވެ. އަދި އޭނާ އާއި ބެހޭ ބައެއް މައުލޫމާތު އޮޅުންފިލުވިއެވެ. އަދި މާލީ ޙާލަތާއި ދިރިއުޅޭ ހާލަތުވެސް އޮޅުން ފިލުވިއެވެ.
އޭނާ ބުނީ އާދައިގެ ފެންވަރެއްގައި ދިރިއުޅެމުންދާ ކަމަށެވެ. ނަމަވެސް މިދުވަސްކޮޅު މިއުޅެނީ މަންމަގެ ލޮލުގެ އޮޕަރޭޝަނަކަށް ނުފުރިގެން ވަރަށް ކަންބޮޑުވެގެން ކަމަށެވެ. އެކަމަށް ޚަރަދުކުރާނެ އެއްވެސް ފައިސާއެއް ނެތުމުން އެކަން ހިންމަވައި ދެއްވަވާތޯ ﷲ އަށް ދުޢާ ކުރަމުން ގެންދާ ކަމަށެވެ.
"އެކަމަށް ޚަރަދުކުރާނެ ފައިސާ ލޯނަކަށް ހޯދަން މަސައްކަތް ނުކުރަނީ ކީއްވެގެންތޯ؟" ސުވާލުކުރުމުން އޭނާ ބުނީ ލޯނެއް ނެގި ނަމަވެސް ލިބޭ އާމްދަނީން ޢާއިލާގެ ކަންކަން ނުކުރެވިގެން އުޅޭއިރު ލޯނު ނުދެއްކޭނެކަން އެނގިހުރެ ލޯނެއް ނަގަން ބޭނުން ނުވާ ކަމަށާއި ﷲ އޭނާއަށް މަގެއް ފަހިކޮށްދެއްވަވާނެ ކަމަށް ޔަޤީން ކުރާ ކަމަށެވެ. "އަޅުގަނޑަކީ މަންމަ ދެކެ އިންތިހާއަށް ލޯބިވާ ދަރިއެއް. އަޅުގަނޑުގެ އަމިއްލަ 2 ދަރިންނަށްވުރެ މަންމަ ދެކެ ލޯބިވޭ. 2 ދަރިންނަށްވުރެ އިތުރަށް މަންމައަށް ޚިދުމަތް ކުރަން. މައިންގެ ދުޢާއިން ދަރިންނަށް ނިޢްމަތްތައް މިންވަރު ކުރައްވަވާއިރު އެކަމުގެ ވަގުތު ޖެހުމުން އަޅުގަނޑުގެ ދުޢާ ﷲ އިޖާބަ ކުރައްވަވާނެ ކަމަށް އަޅުގަނޑު ޔަޤީންކުރާ" ކަމަށެވެ.
ފޯނުކުރި މީހާ އޭނާގެ މިއަޑުތައް އެހުމަށްފަހު ބުނިކަމަށްވަނީ ފޯނުކުރީ އެމީހާގެ ބޭބެގެ އެކައުންޓަށް ޓްރާންސްފަރ ކުރަން އުޅުނު 3000 ޑޮލަރު އެރި އޮޅުމަކުން އޭނާގެ އެކައުންޓަށް ޖަމާ ކުރެވުމުން ބޭންކުން އެނާގެ މައުލޫމާތު ހޯދައިގެން އެ ފައިސާ އަނބުރާ ހޯދުމުގެ ބޭނުމުގައި ކަމަށެވެ. ނަމަވެސް އޭނާ، އޭނާގެ މަންމަ ދެކެ ވާ ލޯތްބާއި އޭނާގެ އީމާންކަމުގެ ވަރުގަދަކަން އެނގުމުން އެ ފައިސާ އަނބުރާ ބޭނުން ނޫން ކަމަށާއި އެ ފައިސާ ހިފައިގެން މަންމަގެ ފަރުވާއަށް އަވަހަށް ފުރުމަށެވެ. އަދި ފަރުވާއިން އެނބުރި އައިސް ބައްދަލުކުރުމަށް އެދޭ ކަމަށެވެ. ފޯނު ކަނޑައިލީ ބައްދަލުކުރުމަށްޓަކައި އޭނާގެ މައުލޫމާތު ދިނުމަށްފަހުގައެވެ.
އޭނާ އަވަސް އަވަހަށް މަންމަގެ ފަރުވާއަށް އިންޑިއާއަށް ދިއައެވެ. ފަރުވާ ނިމިގެން މާލެ އައިސް އެ ދީލަތި މީހާ އާއި ބަދަލުކުރުމުން މިހާރުވަނީ މަހަކު އޭނާއަށް ކުރިން ލިބެމުން ދިއަ 30000 ރުފިޔާ ލިބޭނެ، އެ ދީލަތި މީހާގެ ވަޒީފާއެއް ދީފައެވެ. އަދި ދިރިއުޅޭނެ އެމީހާގެ ތަނެއް ވެސް ދީފައެވެ. އެކަމުގެ ސަބަބުން ކުރިން ކުއްޔަށް މަހަކު ދައްކަމުން އައި 20000 ރުފިޔާ މިހާރު ވަނީ ސަލާމަތް ކުރެވިފައެވެ. 30000 ރުފިޔާ އެކުގައި ބޭނުންކުރަން ލިބުމުން އޭނާ މިހާރު ދިރިއުޅެނީ ތަނަވަސްކަމާއިއެކުގައެވެ.
މިއީ މިއަދުނޫހުގެ ކިޔުންތެރިއަކު ހިއްސާކުރި މައުލޫމާތުގެ މައްޗަށް ލިޔެފައިވާ ލިޔުމެކެވެ. މައިންނަށް އޯގާތެރިވުމާއި، ޚިދުމަތް ކުރުމާއި ﷲ ތަޢާލާގެ މަގުގައި ސާބިތުވެ ހުރެ ﷲ ތަޢާލާއަށް އިތުބާރުކޮށް ދުޢާ ކުރުމުގެ ހުރި ފައިދާ މި ހާދިސާއިން ވަރަށް ރަނގަޅަށް އެނގިގެންދެއެވެ.
