ލިޔުނީ: ޒިދާން މުހައްމަދު
ރާއްޖޭގެ ހުރިހާ ކޯޓުތައް އެއް ވިއުގަ ނުވަތަ ނެޓުވޯކަކުން ގުޅާލުމަށް ޖުޑިސަރީ ސާވިސް ކޮމިޝަން (ޖޭ.އެސް.ސީ) ނިންމައި، ދިރާގާ ޕްރޮޖެކްޓް ހަވާލުކޮށްފިއެވެ. ދިރާގާ މި ޕްރޮޖެކްޓް ހަވާލުކޮށްފައި ވަނީ މިއަދު ބޭއްވި ނޫސްވެރިންގެ ބައްދަލުވުމެއްގައެވެ.
އެ ގޮތުން، މި ޕްރޮޖެކްޓާ ހަވާލުވެ، ދިރާގުގެ ފަރާތުން ވަނީ ޖޭ.އެސް.ސީ އާއެކު އެއްބަސްވުމެއްގައި ސޮއެކޮށްފައެވެ. މި އެއްބަސް ވުމުގައި ޖޭ.އެސް،ސީގެ ފަރާތުން ސޮއެ ކުރައްވީ ޖުޑިސިރީ އެޑްމިނިސްޓްރޭޓާ ޑރ. އަބްދުﷲ ނަޒީރު އެވެ. އަދި ދިރާގު ފަރާތުން ސީއޯއޯ އިސްމާއިލް ރަޝީދެވެ. ދިރާގުން ބުނާ ގޮތުގައި ކުރިއަށް އޮތް މަހެއްހާ ދުވަސްތެރޭ ނުވަތަ އެއަށް ވުރެ ވެސް އަވަސް މުއްދަތެއްގެ ތެރޭގައި މި ޕްރޮޖެކްޓް ނިންމާލެވޭނެއެވެ.
މި ޕްރޮޖެކްޓަކީ ޕޭޕާ ވޯކްސް މަދުކޮށް، ވީޑިއޯ އަދި އޯޑިއޯ ކޮންފަރެންސް މެދުވެރިކޮށް ކޭސްތައް ނިންމާލުމުގެ މަގުފަހިކުރުމުގެ މަގުސަދުގައި ކުރިއަށް ގެންދާ ޕްރޮޖެކްޓެކެވެ. އަދި މި ޕްރޮޖެކްޓްގެ ސަބަބުން ކޯޓުގައި ބަލަމުންދާ މައްސަލައަކާ ގުޅިގެން، ހާޒިރުކުރަން ޖެހޭ ފަރާތެއް އެހެން ރަށެއްގައި ހުރި ކަމުގައި ވިޔަސް، އެ މީހަކު ހުރި ރަށެއްގެ ކޯޓު މެދުވެރިކޮށް ޝަރީއަތައް ހާޒިކުރެވުމުގެ ލުއި ގޮތް ފަހިވެގެންދާނެކަމަށެވެ.
