ޢަރަބިއްޔާއަށް ޓީޗަރުން ހަމަކުރެވޭނެ ދުވަހެއްވެސް ނޭނގޭތީ ރައީސުލްޖުމްހޫރިއްޔާ ފައިންޕުޅު ދެކެން ބެލެނިވެރިން މިހާރު ގޮސް ތިބީ ރައީސުލްޖުމްހޫރިއްޔާގެ އޮފީހުގައެވެ.
ބެލެނިވެރިއަކު މައުލޫމާތު ދެއްވި ގޮތުގައި ޢަރަބިއްޔާއަށް އަންނަން ޖެހޭ 22 ޓީޗަރުން އަދިވެސް ނާދެއެވެ. މަހެއްހައި ދުވަސްފަހުން އަންނާނެ ކަމަށް ބުނި ނަމަވެސް އެކަމުގެ އެއްވެސް ޔަޤީންކަމެއް ނުދެއެވެ.
"މިހާރު ކިޔަވައިދެއްވަނީ އެމްއެންޔޫއިން ވަޑައިގަންނަވާ ވަގުތީ ބޭފުޅުން. އެބޭފުޅުންނަށްވެސް ކިޔަވައިދެއްވެން އަންނަނީ ފެބްރުއަރީ މަހުގެ 24 ވަނަ ދުވަހާއި ހަމައަށް. އެހިސާބަށް ދާއިރުވެސް ޓީޗަރުން ހަމަކުރެވޭނެ ކަމުގެ އެއްވެސް ޔަޤީންކަމެއް ނުދެވުނު. އެޑިޔުކޭޝަން މިނިސްޓްރީއަށް ގޮސްގޮސްވެސް ހައްލެއް ނުދެއްކި."
ބެލެނިވެރިން ބުނީ މިއަހަރު ޝަހާދާ ސާނަވީ ހަދާ ދަރިވަރުންވެސް ތިބީ ގޮތެއް ނެތިފައި ކަމަށެވެ. ނަމެއްގައި ސްކޫލް ހުޅުވި ނަމަވެސް ކިޔަވައިދިނުމުގެ ކަންކަން އަދިވެސް ވަނީ ނުފެށި ކަމަށާއި ރައީސުލްޖުމްހޫރިއްޔާ ފައިންޕުޅު ދެކެން ދިއައީ އެނޫން ގޮތަކުން މައްސަލައަށް ޙައްލެއް ނުފެނިގެން ކަމަށެވެ.
