ލ. އަތޮޅަށް ކުރެްއވި ދަތުރުފުޅު ނިންމަވާލެއްވުމަށްފަހު ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙު މިރޭ މާލެ ވަޑައިގެންފިއެވެ.
ރައީސް ޞާލިޙް އާއި އަނބިކަނބަލުން ފަޒުނާ އަހުމަދު ލ. އަތޮޅުގެ ބައެއް ރަށްރަށަށް މިކުރެއްވި ޒިޔާރަތުގައި ވަނީ ލ. ގަމުގައި ޓީ. އެފް. ޖީ.ގެ ފަރާތުން ބޭއްވި މެރެތަން ދުވުން ރަސްމީކޮށް ފަށްޓަވައި ދެއްވައިފައެވެ. އަދި ރައީސުލްޖުމްހޫރިއްޔާގެ ދެކަނބަލުން މިއަދު ވަނީ މެރެތަންގެ ފަސް ކިލޯމީޓަރު ދުވުމުގައި ވެސް ބައިވެރިވެ ވަޑައިގެންފައެވެ.
މީގެއިތުރުން މިދަތުރުފުޅުގައި ރައީސުލްޖުމްހޫރިއްޔާވަނީ ހައްދުންމަތީގެ ބައެއް ކައުންސިލްތަކާއި ބައްދަލުކުރައްވައި ބައެއް މުއައްސަސާތަކަށް ޒިޔާރަތްކުރައްވައި ބައެއް މުއައްސަސާތަކުގެ އިސްވެރިންނާ ބައްދަލުކުރައްވާފައެވެ.
އެގޮތުން ރައީސް ޞާލިޙު ވަނީ ލ. ގަމު ރީޖަނަލް ހޮސްޕިޓަލަށް ޒިޔާރަތް ކުރައްވާ އެ ތަނުގެ ހާލަތު ބައްލަވާލައްވާފަ އެވެ.
ލ. އަތޮޅު ގާދޫން އެ އަތޮޅު ފޮނަދޫ އަށް ބަދަލުކޮށްފައިވާ ބައެއް މީހުންނާ ވެސް ރައީސް ސޯލިހު ވަނީ ބައްދަލު ކުރައްވާފަ އެވެ. އެ ބައްދަލުވުމުގައި އެ މީހުންގެ ދިރިއުޅުމުގެ ހާލަތު ރައީސް ވަނީ އޮޅުންފިލުއްވާފަ އެވެ. އަދި އެ މީހުންނަށް ދަތިފާ ކަންކަން ވީހާވެސް އަވަހަކަށް ހައްލު ކުރެއްވުމަށް މަސައްކަތް ކުރައްވާނެ ކަމުގެ ޔަގީންކަން ރައީސް ސޯލިހު ދެއްވި އެވެ.
