ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް، ހައްދުންމަތީގެ ބައެއް ރަށްރަށަށް މިހާރު ކުރައްވަމުން ގެންދަވާ ދަތުރުފުޅުގައި އެއަތޮޅު ގަމު ކައުންސިލްގެ މެންބަރުންނާއި ގަމުގެ ބައެއް މުއައްސަސާތަކުގެ އިސްވެރިންނާ މިއަދު މެންދުރުފަހު ވަކިން ބައްދަލުކުރައްވައިފިއެވެ.
ގަމު ކައުންސިލުގެ މެންބަރުންނާއެކު ރައީސުލްޖުމްހޫރިއްޔާ ބޭއްވެވި ބައްދަލުކުރެއްވުމުގައި ކައުންސިލް މެންބަރުން ވަނީ ކައުންސިލްގެ މަސައްކަތްތައް ކުރިޔަށް ދާގޮތުގެ މަޢުލޫމާތު ރައީސުލްޖުމްހޫރިއްޔާއާ ޙިއްޞާކުރައްވައި ކައުންސިލްގެ މަސައްކަތްތައް ކުރިޔަށް ގެންދިޔުމުގައި ދިމާވާ ދަތިތަކާއި ރަށުގެ ތަރައްޤީއަށް ރާއްވަވާފައިވާ ކަންކަމުގެ މަޢުލޫމާތު އެމަނިކުފާނާ ޙިއްޞާކުރައްވާފައެވެ.
މިގޮތުން މަޝަވަރާކުރެއްވެވި ކަންތައްތަކުގެތެރޭގައި ގޯތިގެދޮރުގެ ދަތިކަން ހައްލުކުރުމާއި، މަގުތައް މަރާމާތުކުރުމާއި، މީހުން ވަޒަންވެރިކުރުވުމާއި، ވަޒީފާ ނެތް ގިނަ ޒުވާނުންތަކެއް ތިބުމާއެކު ވަޒީފާގެ ދަތިކަން ހައްލުކުރެއްވުމަށް ފަތުރުވެރިކަން ތަރައްޤީ ކުރުމާއި، ކުނި މެނޭޖްކުރުން ފަދަ ކަންކަމާއި ބެހޭގޮތުން ކައުންސިލް މެންބަރުން ރައީސުލްޖުމްހޫރިއްޔާއާ ފުޅާ ދާއިރާއެއްގައި މަޝްވަރާކުރެއްވިއެވެ.
ގަމުގެ ބައެއް މުޢައްސަސާތަކުގެ އިސްވެރިންނާއެކު ރައީސުލްޖުމްހޫރިއްޔާ ބޭއްވެވި ބައްދަލުކުރެއްވުމުގައި ވަކި ވަކި މުއައްސަސާތައް ހިންގުމުގައި ދިމާވާ ދަތިތަކުގެ މަޢުލޫމާތު އޮޅުންފިލުއްވައި އެކަންކަން ހައްލުކުރެވޭނެގޮތްތަކާއިމެދު މަޝްވަރާކުރައްވާފައިވެއެވެ.
ލ. ގަމު ކައުންސިލާއި ބައެއް މުޢައްސަސާތަކުގެ އިސްވެރިންނާ ރައީސް ބައްދަލުކުރައްވައިފި
