ޤާނޫނާ ޚިލާފުވެ ހަމަނުޖެހުން ހިންގާ މީހުންނަށް އަޅަންޖެހޭ ފިޔަވަޅުތައް ބަޔާންކުރާ ޤާނޫނުތައް އެބަހުރި ކަމަށާއި އެ ފިޔަވަޅުތައް އަޅުއްވަން ފަސްޖެހިވަޑައިނުގަންނަވާނެ ކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވެއްޖެއެވެ.
އެމަނިކުފާނު މިކަން ހާމަކުރެއްވީ ރައީސުލްޖުމްހޫރިއްޔާގެ އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައެވެ.
ރާއްޖޭގައި އެހެން ދީންތަކަށް ވަކާލާތުކުރާ އަދި އިސްލާމް ދީނަށް ގޮންޖަހައި ފުރައްސާރަކުރާ މީހުންގެ އަމަލުތައް ރަނގަޅަށް އެނގިވަޑައިގަންނަވާކަން ބަޔާން ކުރައްވައި ރައީސް އިބްރާހީމް މުޙއްމަދު ޞާލިޙް ވިދާޅުވީ ސޯޝަލް މީޑިއާގައި ހިނގަމުންދާ ބަހުސްތައް ރަނގަޅަށް އެނގިވަޑައިގަންނަވާ ކަމަށެވެ. އަދި ރާއްޖޭގެ ހަމަނުޖެހުން ނަގައިލުމަށް އެއްވެސް މީހަކު އެއްވެސް ކަމެއް ކުރުމަކީ އެދިވަޑައިގަންނަވާ ކަމެއް ނޫން ކަމަށެވެ.
"އަޅުގަނޑުމެންގެ ދީނަކީ ކޮބައިކަމާ އަޅުގަނޑުމެން އުޅެންވީ ގޮތް ޤާނޫނު އަސާސީގަ ވަރަށް ސާފުކޮށް ބަޔާންކޮށްފަ އެބައޮތް. އެކަން އަޅުގަނޑުމެންގެ މެނިފެސްޓޯގަ ވަރަށް ރަނގަޅަށް ބަޔާންކޮށްފަ އެބަ އޮތް."
ރައީސް އިބްރާހީމް މުޙއްމަދު ޞާލިޙް ވިދާޅުވީ "އަޅުގަނޑުމެންގެ ސިޔާސަތަކީވެސް އެއީ" ކަމަށާއި އެ ޢާއި ޚިލާފަށް އެއްވެސް ކަމެއް ކުރުމުގެ ފުރުޞަތު ނުދެއްވަވާނެ ކަމަށެވެ. އަދި ޤާނޫނުތައްވެސް އެބަހުރި ކަމަށާއި ޤާނޫނުތައް ތަންފީޒުކުރެއްވުމުގައި ފަސްޖެހިވަޑައި ނުގަންނަވާނެ ކަމަށެވެ.
ރައްޔިތުން ހަވާލުކުރި މަސްއޫލިއްޔަތަކީ ޤާނޫނުތައް ނެގެހެއްޓުން ކަމަށްވާއިރު އެމަސައްކަތް ކުރެއްވުމުގައި ސާބިތުކަމާއިއެކު ދެމިހުންނަވާނެ ކަމުގެ ޔަޤީންކަން މިއަދުވެސް ރައީސް އިބްރާހީމް މުޙައްމަދު ޞާލިޙް ވަނީ ދެއްވައިފައެވެ.
