ބޭނުންފުޅުވަނީ ސަރުކާރަށް އެއްބާރުލުން ދޭނެ މަޖިލީހެއް ކަމަށާއި ސަރުކާރު ހިންގުމަށް ކޯލިޝަނުގެ ތެރޭގައި އެއްވެސް މައްސަލައެއް އަދި އެއްވެސް ހުރަހެއް ވެސް ނެތް ކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވެއްޖެއެވެ.
ރައީސް އިބްރާހީމް މުޙައްމަދު ޞާލިޙް މިމޭރުމުން ވިދާޅުވީ ސަރުކާރު ހިންގޭނީ މަޖިލީހުގެ މެޖޯރިޓީ އެމްޑީޕީއަށް ލިބިގެން ކަމަށް އެ ޕާޓީން ބުނަމުން ގެންދާތީ އެމަނިކުފާނުގެ ވިސްނުންފުޅު ހުރިގޮތަކާއިމެދު ނޫސްވެރިއަކު ދެންނެވި ސުވާލެއްގެ ޖަވާބުގައެވެ.
ރައީސް އިބްރާހީމް މުޙައްމަދު ޞާލިޙް ވިދާޅުވީ ސަރުކާރުގައި ޕާޓީތަކުގެ ހިއްޞާ އޮތް ނިޞްބަތުން މަޖިލިހުގެ ގޮނޑިތަކަށް ވާދަކުރުމަށް ޖުމްހޫރީ ޕާޓީ އާއި އަދާލަތު ޕާޓީ އާއިއެކު އެމަނިކުފާނާއި ޙަސަން ލަޠީފް ސޮއިކުރައްވާފައިވާނެ ކަމަށެވެ. އަދި އެމަނިކުފާނު މިހާރުވެސް ޤަބޫލުފުޅު ކުރައްވަނީ އެންމެ ފައިދާ ބޮޑުވާނީ ކޯލިޝަން ޕާޓީތައް ގުޅިގެން މަޖިލިސް އިންތިޚާބުގައިވެސް ވާދަކުރުމުން ކަމަށެވެ.
ރައީސް އިބްރާހީމް މުޙައްމަދު ޞާލިޙް ވިދާޅުވީ އެމަނިކުފާނު ދެކެވަޑައިގަންނަވަން ބޭނުންފުޅުވަނީ ކޯލިޝަނުގެ 4 ޕާޓީގެ މެންބަރުން ތިބޭ އަދި ސަރުކާރަށް މެޖޯރިޓީ އޮތް މަޖިލީހެއް ކަމަށެވެ.
މީގެ އިތުރުން އެއްވެސް ރައްޔިތެއްގެ ފަރުދީ ޙައްޤު ގެއްލޭ ގޮތަށް މަޖިލީހުން ފާސްކުރާ އެއްވެސް ޤާނޫނެއް ތަންފީޒު ނުކުރައްވާނެ ކަމަށާއި އެހެންކަމުން ރައީސް ނަޝީދަށް މަޖިލީހަށް ކުރިމަތި ނުލެއްވޭ ގޮތަށް ފާސްކުރާ ޤާނޫނެއްވެސް ތަޞްދީޤް ނުކުރައްވާނެ ކަމަށް ވެސް ރައީސް އިބްރާހީމް މުޙައްމަދު ޞާލިޙް ވިދާޅުވިއެވެ.
