ރާއްޖޭގައި އިސްލާމް ދީން ނޫން އެހެން ދީނަކަށް ފުރުޞަތު ނުދެއްވާނެ ކަމަށާއި ހަމައެއާއިއެކު ދީނުގެ ނަމުގައި ހައްދު ފަހަނައަޅައި ދިއުމަށްވެސް ފުރުޞަތު ނުދެއްވާނެ ކަމަށް ރައީސް އިބްރާހީމް މުޙައްމަދު ޞާލިޙް ވިދާޅުވެއްޖެއެވެ.
ރައީސް އޮފީހުގައި ނޫސްވެރިންނަށް މައުލޫމާތު ދެއްވަމުން ރައީސް އިބްރާހީމް މުޙައްމަދު ޞާލިޙް ވިދާޅުވީ ރާއްޖެ ދެމިއޮންނާނީ 100% މުސްލިމް ޤައުމެއްގެ ގޮތުގައިކަން ޤާނޫނު އަސާސީން ވަރަށް ސާފު ކަމަށާއި އަދި އެމަނިކުފާނުގެ މެނިފެސްޓޯގައިވެސް އެކަން ބަޔާންކޮށްފައިވާ ކަމަށެވެ.
ރައީސް އިބްރާހީމް މުޙައްމަދު ޞާލިޙް ވިދާޅުވީ މިހާރު އުފެދިގެން އުޅޭ ޚިޔާލުތަފާތުވުންތަކުގެ ސަބަބުން ޤައުމުގައި ވަނީ ކަން ބޮޑުވުން އުފެދިފައިވާ ކަމަށާއި އެކަމުގެ ސަބަބުން ޤައުމުގައި ހަމަނުޖެހުމެއް އުފެދިދާނެ ކަމަކަށް ފުރުޞަތު ނުދެއްވާނެ ކަމަށެވެ.
ރައީސް އިބްރާހީމް މުޙައްމަދު ޞާލިޙް ވިދާޅުވީ އެމަނިކުފާނުގެ ވެރިކަން ފެށުމާއިއެކު ރާއްޖެއަށް ޒިޔާރަތްކުރާ ފަތުރުވެރިންގެ އަދަދު ގިނަވެއްޖެ ކަމަށާއި އިންވެސްޓަރުންގެ ޝައުޤްވެރިކަން ވެސް އަންނަނީ އިތުރުވަމުން ކަމަށެވެ. އެހެންކަމުން ޤައުމުގައި ހަމަޖެހުން އޮތުމަކީ ވަރަށް މުހިންމު ކަމެއް ކަމަށެވެ.
