ރާއްޖޭގެ އެތެރޭގެ އުދުހުންތަކުގެ އަގު ހެޔޮ ކުރުމާއި އިންޓަރނެޓުގެ އަގުހެޔޮކުރުމަކީ ރައީސް އިބްރާހީމް މުޙައްމަދު ޞާލިޙްގެ 2 ވައުދެވެ. ފުރަތަމަ 100 ދުވަހުގެ ތެރޭގައި އެ ވައުދުތައް ފުއްދާނެ ކަމުގެ ޔަޤީންކަން ސަރުކާރުން ވަނީ ދީފައެވެ.
ވައިގެ ދަތުރުފަތުރުތަކުގެ އަގުހެޔޮ ކުރުމާއި ބެހޭ ގޮތުން ޓްރާންސްޕޯޓް މިނިސްޓްރީން ނުވަތަ ސިވިލްއެވިއޭޝަން އޮތޯރިޓީން ނިންމަންޖެހޭ ކަންކަން ނިންމައި ގުޅުންހުރި އިދާރާތަކަށް މިހާރު ވަނީ ފޮނުވާފައި ކަމަށް ޓްރާންސްޕޯޓް އޮތޯރިޓީން ބުނެފައެވެ.
އެހެންކަމުން ރައްޔިތުންގެ އިންތިޒާރަށް އަވަސް ނިމުމެއް އަންނާނެ ކަމަށް ވަނީ ބެލިފައެވެ. މި ދެކަމަކީވެސް ރައްޔިތުންނަށް ވަރަށް ބޭނުންތެރި ދެ ކަންތައްކަން ރައްޔިތުންގެ ގިނަ ބައަކު ފާހަގަކުރާއިރު ކުޑަކުރާ އަގާއިމެދު ރައްޔިތުންގެ މެދުގައި ވަނީ ޚިޔާލުތަފާތުވެފައެވެ.
އެއްބައަކު ބޭނުންވަނީ ބޮޑުތަނުން އަގުހެޔޮކޮށް ދިނުމަށްފަހު ލިބޭ ގެއްލުމަށް ސަރުކާރުން ސަބްސިޑީ ދިނުމަށެވެ. އަނެއްބައަކު ބުނަނީ ބަޖެޓު މިހާރުވެސް ޑިފިސިޓްވެފައިވާއިރު ސަރުކާރުން އިތުރު ސަބަސިޑީ ދޭނަމަ ބާރު ބޮޑުވާނީ ހަމަ ރައްޔިތުންގެ ޖީބުތަކަށް ކަމަށެވެ. އެހެންކަމުން ސަރުކާރުން ސަބްސިޑީ ދޭން ނުޖެހޭނެ މިންވަރަކުން އަގުހެޔޮކޮށްދިނުމުން ވެސް އެއީ ކޮށްދެވޭ ވަރަށް ބޮޑު ކަމެއް ކަމަށެވެ.
