\ސަރުކާރުން ގައުމީ އެއާލައިން މޯލްޑިވިއަންގެ ހިންގުމަށް ގެނައި ބަދަލުތަކާއެކު އެދެވޭ ރަނގަޅު ނަތީޖާ ފެންނަން ފަށާފައިވާ ކަމަށް ފަތުރުވެރިކަމާއި މަދަނީ އުދުހުންތަކާ ބެހޭ ވަޒީރު މުޙައްމަދު އަމީން ވިދާޅުވެއްޖެއެވެ.
ވަޒީރު އަމީން މިހެން ވިދާޅުވީ މޯލްޑިވިއަންގެ އައު ސީޕްލޭން ޓަރމިނަލް ހުޅުވުމަށް ބޭއްވި ރަސްމިއްޔާތުގައި ވާހަކަފުޅު ދައްކަވަމުންނެވެ.
2018 އިން 2023 އަށް ކުންފުނި އެކަށީގެންވާ ގޮތެއްގައި ނުހިންގުމުގެ ސަބަބުން މުޅި އޮޕަރޭޝަން ހުއްޓި، ބޮޑެތި ދަރަނިތަކާއެކު ކުންފުނި ވަރަށް ބަލިކަށި ހާލަތަކަށް ވެއްޓުނުކަން ވަޒީރު ފާހަގަކުރެއްވިއެވެ. ނަމަވެސް 2023 ވަނަ އަހަރުގެ ފަހުން މެނޭޖްމެންޓަށާއި ހިންގުމަށް ގެނައި ހަރުދަނާ ބަދަލުތަކާއެކު، ބޮޑު ދަރަނީގައި އޮތް ކުންފުނި މިހާރު ވަނީ "ޓަރންއެރައުންޑް" ކުރެވި، ކުރިއެރުމުގެ މަގަށް މިސްރާބު ޖަހާފައެވެ.
"ނޭޝަނަލް ކެރިއާ އޮންނަންވާނީ ރަނގަޅު ސްޓޭޓަސްއެއްގައި، ރަނގަޅު ފެންވަރެއްގައި،" ވަޒީރު ވިދާޅުވިއެވެ.
މީގެއިތުރުން، ސީޕްލޭންގެ ޚިދުމަތް އައު މޮޑެލްއަކަށް ބަދަލުކުރުމާއި، ކުންފުނީގެ އުމްރާނީ ތަރައްޤީއަށް ބޭނުންވާ އައު އިމާރާތުގެ މަސައްކަތްތައް ކުރިއަށްދާކަން ވަޒީރު ފާހަގަކުރެއްވިއެވެ. އަދި މޯލްޑިވިއަންގެ މުވައްޒަފުންނަށް ދިމާވެފައިވާ ގެދޮރުވެރިކަމުގެ މައްސަލައަށް ހައްލެއް ހޯދައިދިނުމަށްޓަކައި ދެ ބިމެއް ހަވާލުކޮށް، އަމަލީ މަސައްކަތް ވަރަށް އަވަހަށް ފެށޭނެކަމަށްވެސް ވަޒީރު ވިދާޅުވިއެވެ.
