ދަތުގެ ފަރުވާ ދެއްވުމުގައި ގިނަގުނަ ޚިދުމަތްތަކެއް ކުރައްވާފައިވާ ޢަބްދުﷲ ސަޢީދު (ދަތްޖަހާ ސަޢީދު) އަވަހާރަވުމާ ގުޅިގެން ރައީސުލްޖުމްހޫރިއްޔާ ތަޢުޒިޔާ ވިދާޅުވެއްޖެއެވެ.
ރައީސުލްޖުމްހޫރިއްޔާ ސޯޝަލް މީޑިއާގައި ކުރެއްވި ޕޯސްޓެއްގައި ވިދާޅުވީ، ދަތުގެ ފަރުވާ ދެއްވުމުގައި މުޅި ރާއްޖެއަށް މަޤުބޫލުވި ޚިދުމަތްތެރިޔާ ޢަބްދުﷲ ސަޢީދު އަވަހާރަވުމަކީ ޤައުމަށް ލިބުނު ވަރަށް ބޮޑު ހިތާމައެއް ކަމަށެވެ.
މީގެއިތުރުން ރައީސް ފާހަގަކުރެއްވި ގޮތުގައި، މަރްޙޫމް ޢަބްދުﷲ ސަޢީދަކީ ދިގު މުއްދަތެއްގައި ޞިއްޙީ ޚިދުމަތުގައި އުޅުއްވުމުގެ އިތުރުން، ދިވެހި މަސައްކަތްތެރިކަމުގެ އެކި ފަންނުތަކުގައިވެސް ބޮޑެތި ކާމިޔާބީތަކެއް ހާސިލު ކުރައްވާފައިވާ ހުނަރުވެރިއެކެވެ.
ރައީސުލްޖުމްހޫރިއްޔާގެ މެސެޖު ނިންމަވާލައްވަމުން ވަނީ މާތްﷲގެ ރަޙްމަތާއި އޯގާވަންތަކަމުގައި، އަދި ސުވަރުގޭގެ ދާއިމީ ނިޢުމަތުގައި މަރްޙޫމް ޢަބްދުﷲ ސަޢީދު ލެހެއްޓެވުން އެދި ދުޢާ ދަންނަވާފައެވެ.
