ޤައުމީ އެއާލައިން، މޯލްޑިވިއަންގެ އައު ސީޕްލޭން ޓާމިނަލް ޒަމާނީ އަދި ލަގްޒަރީ ޚިދުމަތްތަކާއެކު ރަސްމީކޮށް ހުޅުވައިފިއެވެ. މި ޓާމިނަލް ރަސްމީކޮށް ހުޅުއްވައިދެއްވީ ފަތުރުވެރިކަމާއި މަދަނީ އުދުހުންތަކާ ބެހޭ ވަޒީރު މުޙައްމަދު އަމީންއެވެ.
މި އައު ޓާމިނަލަކީ ރިސޯޓުތަކާއި އެކަމާ ގުޅުންހުރި އެހެނިހެން ހިއްސާދާރުންގެ މަޝްވަރާއާއެކު، ރާއްޖެ އަންނަ ފަތުރުވެރިންނަށް ރާއްޖޭގެ ގުދުރަތީ ރީތިކަމާއި ދިވެހި ސަގާފަތް ފުރިހަމައަށް ދައްކުވައިދޭ ގޮތަށް ޚާއްޞަ ސަމާލުކަމެއް ދީގެން ފަރުމާކޮށްފައިވާ ތަނެކެވެ.
ކުރީގެ ޓާމިނަލާ ޚިލާފަށް، މި އައު ޓާމިނަލްގެ އާންމު ސަރަޙައްދު ވަނީ ދަތުރުވެރިންނަށް ފަސޭހަވާނޭހެން ފުރިހަމައަށް އޭސީކޮށްފައެވެ. ޓާމިނަލްގެ އެތެރޭގެ ސަރަޙައްދުގައި އެއްފަހަރާ 90 މީހުންނަށް އަދި ބޭރު ސަރަޙައްދުގައި 40 މީހުންނަށް ޚިދުމަތް ދިނުމުގެ ޖާގަ ވަނީ ތަނަވަސްކޮށްދީފައެވެ.
މީގެއިތުރުން، ފަތުރުވެރިންގެ ފަސޭހައަށްޓަކައި "ހުވަނދުމާ" ލައުންޖްގެ އިތުރުން މަތީ ފަންގިފިލާގައި 2 ޕްރައިވެޓް ލައުންޖް ވަނީ ޤާއިމުކޮށްފައެވެ. އަދި އާއިލާތަކާއެކު ދަތުރުކުރާ ކުޑަކުދިންނަށް ޚާއްޞަ ކުޅޭ ސަރަޙައްދަކާއި، މޯލްޑިވިއަންގެ ސުވެނިއަރ އަދި ކާބޯތަކެތި ލިބޭނެ ޚާއްޞަ ކިއޮސްކެއްވެސް މި ޓާމިނަލުގައި ހިމެނެއެވެ.
މި ޓާމިނަލްގެ ޚިދުމަތްތައް އިތުރަށް ފުރިހަމަކުރުމުގެ ގޮތުން، ޓާމިނަލަށް ޚާއްޞަކޮށްގެން ތައްޔާރުކޮށްފައިވާ ޔުނީކް އޯޑިއޯ ތީމެއް ބޭނުންކުރުމަށް ވަނީ ހަމަޖެހިފައެވެ.
