ކަނޑުމަގުން ރާއްޖެއަށް ވަގަށް އެތެރެކުރަން އުޅުނު 8.5 މިލިއަނަށް ވުރެ ގިނަ ސިނގިރޭޓް މޯލްޑިވްސް ކަސްޓަމްސް ސަރވިސްއިން އަތުލައިގެންފިއެވެ.
ކަސްޓަމްސްއިން މައުލޫމާތު ދިން ގޮތުގައި މި ތަކެތި އަތުލައިގެންފައިވަނީ، މިދިޔަ އާދީއްތަ ދުވަހު މާލޭ ވިޔަފާރި ބަނދަރުގައި ހިންގި ހާއްސަ އޮޕަރޭޝަނެއްގައެވެ. މި އޮޕަރޭޝަނަކީ ކަނޑުމަގުން ރާއްޖެ އެތެރެކުރި މުދާ ޝިޕްމަންޓެއްގައި ގާނޫނާއި ގަވާއިދާ ހިލާފު ތަކެތި ހުރިކަމަށް ޝައްކުކުރެވިގެން ހިންގި އޮޕަރޭޝަނެކެވެ.
އެގޮތުން، "ޖެނެރަލް ކާގޯ" ގެ ގޮތުގައި ޑިކްލެއަރކޮށްފައިވާ އެ ޝިޕްމަންޓް ބަލައިފާސްކުރިއިރު، އޭގެ ތެރޭގައި ސިއްރުން ފޮރުވައިގެން އެތެރެކުރަން އުޅުނު 8،527،480 (އަށް މިލިއަން ފަސްލައްކަ ހަތާވީސް ހާސް ހަތަރުސަތޭކަ އައްޑިހަ) ސިނގިރޭޓް ވަނީ ފެނިފައެވެ.
މި މައްސަލައާ ގުޅިގެން ފެނުނު އެންމެހައި ސިނގިރޭޓްތައް މިހާރު ވަނީ ކަސްޓަމްސްގެ ބެލުމުގެ ދަށަށް ގެންގޮސްފައެވެ.
