ސުނާމީ އެރި ދުވަހު ދިވެހީން ދައްކުވައިދިން އެއްބައިވަންތަކަން ބައިނަލްއަޤްވާމީ މުޖުތަމައު އިން ބަލައިގެންފައިވަނީ ނަމޫނާއެއްގެ ގޮތުގައި ކަމަށް ރައީސް އިބްރާހިމް މުޙައްމަދު ޞާލިޙު ވިދާޅުވެއްޖެއެވެ.
"ޤައުމީ އެއްބައިވަންތަކަމުގެ ދުވަސް" ފާހަގަ ކުރުމަށް ރ. ދުވާފަރުގައި މިއަދު ބޭއްވި ޖަލްސާގައި ވާހަކަފުޅު ދައްކަވަމުން ރައީސް ޞާލިޙު ވިދާޅުވީ އެދުވަހުގެ އެކާރިސާގައި ރަށްރަަށް ވީރާނާވެ، ގެދޮރު ސުންނާފަތިވެގެން ދިޔައިރުވެސް، އެހެން ޤައުމުތުަކުން ފެނުނުފަދަ ހަމަނުޖެހުންތަކާއި، ތަޅާފޮޅުމާއި، ބައިބައިވުމެއް ދިވެހީންގެ ތެރެއިން އެދުވަހު ނުފެންނަ ކަމަށެވެ.
"އަމިއްލަ ފުރާނަ ނުރައްކަލަށް ހުށަހެޅިގެން ދިޔަ ހިނދުގައިވެސް، އަޅުގަނޑުމެން އިސްކަންދިނީ އަނެކާގެ ފުރާނަ ސަލާމަތް ކުރުމަށް. އަމިއްލަ ހައިހޫނުކަމަށް ކެތްތެރިވެ، އަވަސްވެ ގަތީ އަނެކާގެ ހައިހޫނުކަން ފިލުވައި ދިނުމަށް. އަތުގައި ހުރި އަންނައުނާއި، މުދަލާއި ފައިސާ، އެދުވަހު ހޭދަކުރީ ހާލުގައި ޖެހުނު އަޚުންނާއި އުޚްތުންނަށް" ރައީސް ޞާލިޙު ވިދާޅުވިއެވެ.
މީގެއިތުރުން ރައީސް ޞާލިޙު ވިދާޅުވީ، އެދުވަހު ހާލުގައި ޖެހުނު މީހުންގެ ފުރާނަ ސަލާމަތް ކޮށްދީ، ރައްކާތެރު ތަންތަނަށް ބަދަލު ކުރުމުގައި ދިވެހި ސިފައިންނާއި ފުލުހުން އެދުވަހު ކުރި ބުރަ މަސައްކަތް އަބަދުވެސް ހަނދާން ކުރަން ޖެހޭ ކަމަށާއި އެކާރިސާގެ ދަތިތަކުން އަރައިގަތުމުގައި އެދެ މުއައްސަސާގެ ފަހުލަވާނުން ކުރެއްވި މިންނެތް މަސައްކަތުގެ އަގު، ދުލަކުން ވަޒަން ނުކުރެއްވޭނެ ކަމަށެވެ.
