އިންޑިއާގެ މަޝްހޫރު ކިރުގެ އުފެއްދުންތައް އުފައްދާ ބްރޭންޑެއް ކަމަށްވާ "އަމުލް" ގެ އުފެއްދުންތައް، ސްޓޭޓް ޓްރޭޑިންގ އޯގަނައިޒޭޝަން (އެސްޓީއޯ) ޖެނެރަލް ޓްރޭޑިންގއިން ރާއްޖޭގެ ބާޒާރަށް ރަސްމީކޮށް ނެރެފިއެވެ.
މި ބްރޭންޑް ރާއްޖެއަށް ތައާރަފްކޮށްފައިވަނީ ހުޅުމާލޭ ސިންތެޓިކް ޓްރެކުގައި މި މަހުގެ 28 އިން 30 އަށް ކުރިއަށްދާ "ހޮޓެލް އޭޝިއާ އެގްޒިބިޝަން" ގެ ތެރެއިން އެސްޓީއޯގެ ސްޓޯލްގައި ބޭއްވި ހާއްސަ ހަަފުލާއެއްގައެވެ. މި އުފެއްދުންތައް ބާޒާރަށް ނެރެދެއްވީ އެސްޓީއޯގެ އެގްޒެކެޓިވް ކޮމިޓީ (އެކްސްކޯ) ގެ މެންބަރުންނެވެ.
"ދަ ޓޭސްޓް އޮފް އިންޑިއާ" ގެ ނަމުން މުޅި ދުނިޔޭގައި މަޤްބޫލުކަން ހޯދާފައިވާ އަމުލް (އާނަންދު މިލްކް ޔޫނިއަން ލިމިޓެޑް) ބްރޭންޑަކީ ކިރާއި ކިރުގެ އެކި އުފެއްދުންތަކަށް ޚާއްސަ، ދުނިޔޭގެ ފެންވަރުގައިވެސް ފާހަގަކޮށްލެވޭ ބޮޑު ކުންފުންޏެކެވެ.
އެސްޓީއޯއިން މައުލޫމާތު ދޭ ގޮތުގައި، މި ބްރޭންޑްގެ ކިރާއި، ބަޓަރު، ޗީޒް އަދި އައިސްކްރީމްގެ އިތުރުން ތަފާތު ގިނަ ބާވަތްތައް މިހާރު އެސްޓީއޯ ޕީޕަލްސް ޗޮއިސް މެދުވެރިކޮށް ޢާންމުންނަށް ލިބެން ހުންނާނެއެވެ. މީގެއިތުރުން، އެގްޒިބިޝަން ކުރިއަށްދާ މުއްދަތުގައި އެސްޓީއޯގެ ސްޓޯލުން އަމުލްގެ އުފެއްދުންތައް ބޭނުންކޮށްގެން ތައްޔާރުކޮށްފައިވާ މީރު ފޮނިކާތަކެއްޗާއި އައިސްކްރީމްގެ ރަހަ ބަލާލުމުގެ ފުރުސަތުވެސް ވަނީ ހުޅުވާލާފައެވެ.
މި އުފެއްދުންތަކާ ގުޅޭގޮތުނމީޑިއާއަށް މައުލޫމާތު ދެއްވަމުން އެސްޓީއޯ ޕީޕަލްސް ޗޮއިސްގެ ސޭލްސް މެނޭޖަރު ޢާއިޝަތު ނަޒާހަތު ވިދާޅުވީ، އަމުލްއަކީ ދިވެހިންގެ އިތުރުން އެކި ޤައުމުތަކުގެ މީހުންގެ މެދުގައިވެސް ވަރަށް ބޮޑު މަޤްބޫލުކަމެއް ލިބިފައިވާ ބްރޭންޑެއް ކަމަށާއި އާންމު ކިރުގެ ބާވަތްތަކުގެ އިތުރުން ދިވެހިންގެ މެދުގައި މަޤްބޫލު "ގުލާބް ޖާމުން" ފަދަ އިންޑިއާގެ ހާއްސަ ފޮނިކާތަކެތިވެސް މި ބްރޭންޑްގެ ދަށުން ލިބެން ހުންނާނެ ކަމަށެވެ.
ހޮޓެލް އޭޝިއާ އެގްޒިބިޝަނާ ގުޅުވައިގެން އެސްޓީއޯގެ ސްޓޯލަށް ޒިޔާރަތްކުރާ ފަރާތްތަކަށް ޚާއްސަ ޕްރޮމޯޝަންތަކެއްވެސް ވަނީ ރާވާފައެވެ. އެގޮތުން، ކޮފީސްޓޭޓްގެ ޚާއްސަ ބުއިންތަކާއެކު، ސްޓޯލަށް ޒިޔާރަތްކޮށް "ރެޖިސްޓަރ އެންޑް ވިން" ހަރަކާތުގައި ބައިވެރިވާ ފަރާތްތަކުގެ މެދުގައި ކޮންމެ ދުވަހަކު ގުރުއަތުން ހޮވޭ ނަސީބުވެރިއަކަށް އަގުހުރި އިނާމު ދިނުމަށް ވަނީ ހަމަޖެހިފައެވެ. ހަމައެއާއެކު، އެސްޓީއޯ ޕީޕަލްސް ޗޮއިސްގެ ސޯޝަލް މީޑިއާ ޕޭޖު ފޮލޯކޮށްގެން ކުރިއަށްގެންދާ "ފޮލޯ އެންޑް ވިން" ހަރަކާތުގެ ނަސީބުވެރިޔާއަށް ޑިޝްވޮޝަރެއް ލިބުމުގެ ފުރުޞަތުވެސް އެ ކުންފުނިން ވަނީ ހުޅުވާލާފައެވެ.
