ކުޑަކުދިންނަށް ކުރާ އެކި ބާވަތުގެ އަނިޔާތައް ހުއްޓުވުމަށާއި އެކުދިންގެ ހައްޤުތައް ހިމާޔަތްކުރުމުގެ ބައިނަލްއަޤްވާމީ ނިޒާމު ވަރުގަދަކުރުމަށް އެކުލަވާލާފައިވާ "ބޮގޯޓާ ކޯލް ޓު އެކްޝަން" ޑިކްލަރޭޝަންގައި ރާއްޖެއިން ރަސްމީކޮށް ސޮއިކޮށްފިއެވެ. މި ޤަރާރުގައި ރާއްޖޭގެ ފަރާތުން ސޮއިކުރެއްވީ ސިއްހަތާއި އާއިލާއާއި އިޖުތިމާއީ އެހީއާ ބެހޭ ވަޒީރު ޤީލާ އަލީއެވެ.
މި އެއްބަސްވުމުގައި ސޮއިކުރެއްވުމަށްފަހު ވަޒީރު ވިދާޅުވީ، މިއީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ސަރުކާރުން ކުޑަކުދިންގެ ހައްޤުތައް ކަށަވަރުކޮށް، އެކުދިންނަށް އަމާން މާހައުލެއް ޤާއިމުކޮށްދިނުމަށް ކުރަމުންދާ މަސައްކަތްތަކަށް ލިބުނު ވަރަށް މުހިންމު ކުރިއެރުމެއް ކަމަށެވެ.
"ބޮގޯޓާ ކޯލް ޓު އެކްޝަން" އަކީ 2024 ވަނަ އަހަރުގެ ނޮވެމްބަރު މަހު ކޮލަމްބިއާގެ ބޮގޯޓާގައި ބޭއްވި ކުޑަކުދިންނަށް ކުރާ އަނިޔާ ހުއްޓުވުމާ ބެހޭ ފުރަތަމަ ބައިނަލްއަޤްވާމީ މަހާސިންތާގެ ތެރެއިން އެކުލަވާލެވުނު ޤަރާރެކެވެ. މި ޤަރާރުގެ މައިގަނޑު އަމާޒަކީ ކުޑަކުދިންނަށް ކުރާ އަނިޔާތަކާ ދެކޮޅަށް ފިޔަވަޅު އެޅުމުގެ ޤައުމީ އަދި ބައިނަލްއަޤްވާމީ ނިޒާމުތައް ހަރުދަނާކޮށް، ސިޔާސަތުތައް ތަންފީޒުކުރުން އަވަސްކުރުމެވެ.
މި ރަސްމިއްޔާތުގައި ވާހަކަދައްކަވަމުން ޔުނިސެފުން ރާއްޖެއަށް ކަނޑައަޅުއްވާފައި ހުންނަވާ މަންދޫބު ޑރ. އެޑްވާޑް އަޑައީ ވަނީ ކުޑަކުދިންގެ ރައްކާތެރިކަން ކަށަވަރުކުރުމަށް ރާއްޖެއިން ހޯދަމުންދާ ކާމިޔާބީތައް ފާހަގަކުރައްވައި ތައުރީފު ކުރައްވާފައެވެ.
އެ ރަސްމިއްޔާޓުގައި ވަޒީރު ގީލާ ވިދާޅުވީ ކުޑަކުދިންނަށް ކުރާ އަނިޔާ ހުއްޓުވުމުގައި މާނަހުރި ކުރިއެރުމެއް ހޯދުމަށް ދެމެހެއްޓެނިވި މަސައްކަތްތަކެއް ބޭނުންވާ ކަމަށާއި ދައުލަތުގެ މުއައްސަސާތަކާއި، އާއިލާތަކާއި، މަދަނީ ޖަމުއިއްޔާތަކާއި، ތަރައްގީގެ ބައިވެރިން އަދި ކުޑަކުދިން ވެސް ހިމެނޭހެން، މުޅި މުޖުތަމައު ބައިވެރިވާ ފުރިހަމަ ނިޒާމެއްގެ ތެރެއިން އެކަމަށް އެހީތެރިކަންބޭނުންވާ ކަމަށް ވިދާޅުވިއެވެ.
"ކުޑަކުދިން ރައްކާތެރިކުރުމުގެ ނިޒާމު ހަރުދަނާކުރުމަށާއި އަދި އެކުދިންނަށް ފާގަތި މުސްތަގްބަލެއް ހޯދައިދިނުމަށް މި ސަރުކާރުން އަހަންމިއްޔަތުކަމެއް ދެއްވާ. އެކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު އަށް ޝުކުރު އަދާކުރަން. ކުޑަކުދިންގެ ހައްގުތަކާއި، ރައްކާތެރިކަމާއި އަދި ލާބައަށްޓަކައި ކުރެވޭ މަސައްކަތްތަކުގައި ޔުނިސެފާއި އެހެނިހެން ބައިވެރިން ދެއްވާ އެއްބާރުލުން ފާހަގަކޮށް އެ ހުރިހާ ފަރާތްތަކަށް ވެސް ޝުކުރު އަދާކުރަން." ގީލާ ވިދާޅުވިއެވެ.
މި ޑިކްލަރޭޝަންގައި ޚާއްސަ އިސްކަމެއް ދީފައިވާ ކަންކަމުގެ ތެރޭގައި:
· ހޯދުންތަކާއި އިލްމީ ހެކިތަކުގެ މައްޗަށް ބިނާކޮށް ރައްކާތެރިކަމުގެ ފިޔަވަޅުތައް އެޅުން.
· ޤާނޫނީ އޮނިގަނޑުތަކާއި ކުޑަކުދިން ހިމާޔަތްކުރާ ނިޒާމުތައް އިތުރަށް ހަރުދަނާކުރުން.
· ޑިޖިޓަލް އަދި އިންޓަނެޓްގެ މާހައުލުގައި ކުޑަކުދިންނަށް ކުރިމަތިވާ ނުރައްކާތަކުން ރައްކާތެރިކަން ކަށަވަރުކުރުން.
· ކުޑަކުދިންގެ ހައްޤުތަކާއި މަސްލަހަތާ ގުޅޭ ނިންމުންތަކުގައި އެކުދިންގެ ބައިވެރިވުން މާނަހުރި ގޮތެއްގައި ހިމެނުން.
މި ޤަރާރަކީ ކުޑަކުދިންނަށް ކުރާ އަނިޔާތައް ހުއްޓުވުމަށް ދިވެހި ސަރުކާރުން އެކުލަވާލާފައިވާ "ނޭޝަނަލް އެކްޝަން ޕްލޭން އޮން ޕްރިވެންޝަން އެންޑް ރެސްޕޯންޑިންގ ޓު ވަޔަލެންސް އަގެއިންސްޓް ޗިލްޑްރަން" އާ ސީދާ ގުޅިފައިވާ ކަމެކެވެ.
ސިއްހަތާއި ބެހޭ ވުޒާރާއިން ހާމަކުރި ގޮތުގައި، މި އެއްބަސްވުމުގެ ސަބަބުން ކުޑަކުދިންގެ ރައްކާތެރިކަމަށް ރާއްޖެއިން ކުރާ މަސައްކަތްތައް ބައިނަލްއަޤްވާމީ ފެންވަރުގައި ފުޅާވެ، ދެމެހެއްޓެނިވި ހެޔޮ ބަދަލުތަކެއް ގެނައުމަށް ބައިނަލްއަޤްވާމީ ޖަމާއަތްތަކާއެކު އޮތް ގުޅުން އިތުރަށް ބަދަހިވެގެންދާނެއެވެ.
