ދެހާސް ހަތަރުވަނަ އަހަރުގެ ޑިސެމްބަރ މަހުގެ 26 ވަނަ ދުވަހު، މުޅި ރާއްޖެ ސިއްސުވާލި ސުނާމީގެ ބިރުވެރި ކާރިސާގައި، ރާއްޖޭގެ ރައީސުލް ޖުމްހޫރިއްޔާ އިބްރާހިމް މުޙައްމަދު ޞާލިޙަށް ކުރެވުނު ތަޖުރިބާ، އެމަނިކުފާނު ޙިއްސާ ކުރައްވައިފިއެވެ.
"އެއްބައިވަންތަ ކަމުގެ ދުވަސް" ފާހަގަ ކުރުމުގެ ގޮތުން ރ. ދުވާފަރުގައި މިއަދު ބޭއްވި ޤައުމީ ޖަލްސާގައި ވާހަކަފުޅު ދައްކަވަމުން އެމަނިކުފާނު ވިދާޅުވީ އެދުވަހުގެ އެހާދިސާ އެމަނިކުފާނު އަމިއްލައަށް ވެސް ތަޖުރިބާ ކުރެއްވި ކަމަށެވެ.
"ކަންދިމާކުރި ގޮތުން، އެދުވަހު އަޅުގަނޑަށް ވެސް ހުރެވުނީ އަޅުގަނޑުގެ އުފަން ރަށް، ހިންނަވަރުގައި. ރަށަށް އަރައިގެން އައި ރާޅު ގޭތެރެއަށް ވެދެގެންގޮސް، މުޅި ރަށުގައި ފެން ބޮޑުވެގެންދިޔަ މަންޒަރު، މިއަދުވެސް އަޅުގަނޑުގެ ކުރިމަތިން އެބަ ހާމަވޭ. އަޅުގަނޑުގެ ދެ ކުދިންގެ ތެރެއިން އެއް ކުއްޖަކު ގޭ ކުރިމަތީގައި ހުރި ގަހެއްގެ ކުރިއަށް އަރައި އިން މަންޒަރާއި، އަނެއް ދަރިފުޅު ފާރުބުރިއެއްގެ މައްޗަށް އަރައި އިން މަންޒަރު މިއަދުވެސް އިޙްސާސްވެ، ކުރިމަތިން އެބަ ފެނޭ" ރައީސް ޞާލިޙު ވިދާޅުވިއެވެ.
