މީގެ 14 އަހަރު ކުރިން (2014 ވަނަ އަހަރު) ގެ ޑިސެމްބަރ މަހުގެ 26 ވަނަ ދުވަހު ރާއްޖެއަށް ކުރިމަތިވި ސުނާމީ ކާރިސާގައި، ހުރިހާ ރައްޔިތުންނަށް ވެސް ކުރިމަތިވި ހައިހޫނުކަމުން ސަލާމަތް ކޮށްދިން ވަސީލަތަކީ ކެތްތެރިކަމާއެކު މާތް ﷲ ގެ ޙަޟްރަތަށް އަޅަމެން އެންމެން ދެންނެވި ދުޢާ ކަމަށް ރައީސުލް ޖުމްހޫރިއްޔާ އިބްރާހިމް މުހައްމަދު ޞާލިޙު ވިދާޅުވެއްޖެއެވެ.
"އެއްބައިވަންތަ ކަމުގެ ދުވަސް" ފާހަގަ ކުރުމުގެ ގޮތުން ރ. ދުވާފަރުގައި ބޭއްވުނު ޤައުމީ ޖަލްސާގައި ވާހަކަފުޅު ދައްކަވަމުން ރައީސް ޞާލިޙު ވިދާޅުވީ، ސުނާމީ ކާރިސާއަކީ އަޅުގަނޑުމެންނާއި ކުރިމަތިވި ވަރުގަދަ އިމްތިޙާނެއް ކަމަށާއި އެއިމްތިޙާނުން ލިބުނު ކާމިޔާބީގެ ސިއްރަކީ އަޅުގަނޑުމެންގެ ޢަޤީދާގެ ވަރުގަދަ ކަމާއި، ސާފު އީމާންތެރިކަން ކަމަށެވެ.
"އެކާރިސާގެ ބިރުވެރިކަމުން ހިތްތަކަށް ހަމަޖެހުން ހޯދައިދިނީ، މާތް ﷲ ގެ އޯގާވަންތަކަމާމެދު އަޅުގަނޑުމެންގެ ހިތުގައި އޮތް ޔަޤީންކން. އެދުވަހު ކުރިމަތިވި ހައިހޫނުކަމުން ސަލާމަތް ކޮށްދިން ވަސީލަތަކީ، ކެތްތެރިކަމާއެކު ﷲ ގެ ޙަޟްރަތަށް އަޅުގަނޑުމެން ކުރި ދުޢާ. ގެއްލުނު މުދަލާމެދު ޝަކުވާ ކުރުމުގެ ބަދަލުގައި އަޅުގަނޑުމެން އެދި ދެންނެވީ ﷲ ގެ ދާއިމީ ނިޢުމަތަށް. ވަކިވެދިޔަ ފުރާނަތަކާއިމެދު ކަރުނައަޅާ ހާލުގައިވެސް އަޅުގަނޑުމެން ﷲ ގެ ޙަޟްރަތުގައި އެދި ދެންނެވީ ދާއިމީ ސުވަރުގޭގެ ދަރުމައާއި ޘަވާބަށް" ރައީސް ޞާލިޙު ވިދާޅުވެފައިވެއެވެ.
މީގެއިތުރުން ރައީސް ވިދާޅުވީ އެދުވަހުގެ ހަނދާންތައް އާކުރާއިރު، އެބިރުވެރި ކާރިސާއިން ސަލާމަތް ކޮށްދެއްވި ކަމަށްޓަކައި، އަބަދުވެސް މާތްﷲ އަށް ޙަމްދާއި ޝުކުރު ދަންނަވަން ވާނެ ކަމަށެވެ.
