ޤައުމީ އެއްބައިވަންތަކަމުގެ ދުވަސް ފާހަގަ ކުރެއްވުމަށް، ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙު ރ. ދުވާފަރަށް މިއަދު ކުރައްވާ ދަތުރުފުޅުގެ ތެރެއިން ޅ. އަތޮޅުގައި ތަރައްޤީ ކޮށްފައިވާ ކުޑަދޫ ރިސޯޓު ރަސްމީކޮށް ހުޅުއްވައިދެއްވުމަށް ހަމަޖެހިއްޖެއެވެ.
މުޅިއަކު 15 ވިލާ ހުންނަ ކުޑަދޫ ރިސޯޓަކީ ޖަޕާނު ސްޓައިލަށް ތައްޔާރު ކޮށްފައިވާ ރިސޯޓެކެވެ. ތިމާވެއްޓާއި ވެސް ރަޙުމަތްތެރި ކަންކަން ހިމަނައިގެން ތަރައްގީ ކޮށްފައިވާ މިރިސޯޓުގެ، ވިލާތަކުގެ ފުރާޅުގައި އަވިން ހަކަތަ އުފެއްދުމަށް ސޯލާ ޕެނަލް ހަރުކޮށްފައިވެއެވެ.
އެރިސޯޓުން މައުލޫމާތު ދީފައިވާ ގޮތުގައި، އެސޯލާ ޕެނަލްތަކުގެ ފުލް ކެޕެސިޓީއާއެކު 300 ކިލޯވޯޓުގެ ހަކަތަ އުފެއްދޭނެއެވެ. އެވަރަށް ހަކަތަ އުފެއްދުމުން އެއް ދުވަސް އެއްކޮށް އެހަކަތައިން އެރިސޯޓަށް ކަރަންޓު ދެވޭނެ ކަމަށް ވެސް މައުލޫމާތު ދީފައިވެއެވެ.
ކުޑަދޫ ރިސޯޓު ތަރައްގީ ކޮށްފައިވަނީ ކްރައުން އެންޑް ޗަމްޕާ ރިސޯޓްސް އިންނެވެ.
