ރާއްޖެއަށް ސުނާމީ އެރި ދުވަހު ދިވެހިން ދެއްކި އެއްބައިވަންތަކަމަށް ދިވެހިން އަބަދަށްވެސް ފަހުރުވެރިވާނެ ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ޞާލިޙް (އިބޫ) ވިދާޅުވެއްޖެއެވެ.
ރައީސް ޞާލިޙް މިހެން ވިދާޅުވީ، އެއްބައިވަންތަކަމުގެ ދުވަހާ ގުޅޭގޮތުން، އެމަނިކުފާނު ކުރެއްވި ޓްވީޓެއްގައެވެ. އެމަނިކުފާނު ވިދާޅުވީ ސުނާމީގެ ނާމާންކަމާއި ބިރުވެރިކަމާއެކުވެސް ދިވެހިން ދެއްކި އެއްބައިވަންތަކަމަށް އަބަދަށް ފަހުރުވެރިވާނެ ކަމަށެވެ. އަދި އެމަނިކުފާނު ވަނީ އެ ހިތާމަވެރި ހާދިސާގައި ދުނިޔެ ދޫކުރި މީހުންނަށް ހެޔޮދުޢާ ކުރައްވާ ކަމަށް ވެސް ޓްވީޓުގައި ވިދާޅުވެފައެވެ.
"އަދި އެދުވަހު އަޅުގަނޑުމެން ދޫކޮށްދިޔަ އެންމެނަށް ހެޔޮ ރަހްމަތްލައްވައި،
ދިވެހިން އަބަދުމެ އެއްބައެއްގެ ގޮތުގައި ލެއްވުން އެދި ﷲއަށް ދުއާ ދަންނަވަން" އެމަނިކުފާނު ވިދާޅުވިއެވެ.
ރާއްޖޭގެ އެއްބައިވަންތަ ކަމުގެ ދުވަހަކީ 2004 ގައި ރާއްޖެއަށް ސުނާމީ އެރިދުވަހު ދިވެހިން ދެއްކި އެއްބައިވަންތަކަން ފާހަގަ ކުރާ ދުވަހެވެ. ކޮންމެ އަހަރުކުވެސް މިދުވަސް ފާހަގަ ކުރެއެވެ. އެގޮތުން މިއަހަރު ރަސްމީކޮށް އެއްބައިވަންތަކަމުގެ ދުވަސް ފާހަގަ ކުރަނީ ރ.ދުވާފަރުގައެވެ.
ރައީސް ޞާލިޙް ވަނީ މި ދުވަސް ފާހަގަކުރުމަށް ކުރިއަށް ގެންދާ ހަރަކާތްތަކުގައި ބައިވެރިވުމަށް ދުވާފަރަށް ވަޑައިގެންފައެވެ.
