ﷲ ތަޢާލާގެ 25 ވައުދުފުޅެއް ވެއެވެ! އެ 25 ވަޢުދުފުޅު ކީރިތި ޤްރްއާނުގެ އާޔަތްތަކުން އެނގެން އެބައޮތެވެ. އިންސާނުން ކުރާ ވައުދުތައް ނުފުއްދި ފެއިލްވެއެވެ. ނަމަވެސް ﷲ ތަޢާލާގެ އެއްވެސް ވައުދުފުޅަކާއިމެދު އެއްވެސް މިންވަރަކަށް ޝައްކު ކުރުމެއް ނެތެވެ. މިއިން ކޮންމެ ވަޢުދުފުޅަކީވެސް މުސްލިމުންނަށް ހުރި ވަރަށް އުފާވެރި ޚަބަރުތަކެކެވެ.
ވަޢުދުފުޅު 1: ސުވަރުގެ
"އަދި އީމާންވެ، ޞާލިޙް އަމަލުތައް ކުޅަ މީހުންނަށްޓަކައި ، ހަމަކަށަވަރުން ސުވަރުގެތަކެއް ހުރި ކަމުގެ އުފާވެރި ޚަބަރު ކަލޭގެފާނު އެއުރެންނަށް ދެއްވަވާށެވެ! އެ ސުވަރުގެތަކުގެ ދަށުން ފެންކޯރުތައް ހިނގަ ހިނގާ ހުރެތެވެ. އެ ސުވަރުގެތަކުން ރޯއްޖެއްގެ ގޮތުގައި މޭވާގެ ކޮންމެވެސް ބާވަތެއް، އެއުރެންނަށް ލިބޭ ކޮންމެ ފަހަރަކު، އެއުރެން ބުނެތެވެ. މިއީ ކުރިންވެސް އަހަރުމެންނަށް ލިބުނު މޭވާއެވެ! އެފަދަ މޭވާ ދެއްވަވާހުށީ (ބޭރުފުށުން) އެއްވައްތަރުވާ ޙާލުގައެވެ. އަދި އެ ސުވަރުގެތަކުގައި އެއުރެންނަށްޓަކައި ޠާހިރުވެގެންވާ އަނބިންތަކެއް ވެއެވެ. އަދި އެއުރެން، އެ ސުވަރުގެތަކުގައި އަބަދަށް ދެމިތިބޭ ހުއްޓެވެ." ސޫރަތުލްބަޤަރާ: 25
ނިކަން ވިސްނައިބަލާށެވެ. އަހަރެމެންނަށް އޮތީ ﷲ ތަޢާލާއަށް އީމާންވެ ހެޔޮ އަމަލުތައް ކުރުމެވެ. ނަހީ ކުރެއްވެވި އެންމެހައި ކަންކަމާއި ދުރުހެލިވެ ހުރުމެވެ. އެގޮތުގައި ސާބިތުވެ ހުރި މީހާއަށް ﷲ ތަޢާލާ ވަޢުދުވެވޮޑިގެންފައިވާ ނިޢްމަތްތައް ލިބުމުން ދެން އިތުރަށް ބޭނުންވާނެ އެއްވެސް ކަމެއް ނެތެވެ. ހަމަ އެއާއިއެކު އެނގިގެންދަނީ ސުވަރުގެއަކީ އާދައިގެ ތަނެއް ނޫންކަމާއި އަހަރެމެންނަށް ބޭނުންވާ ހުރިހާ ކަމެއް ނުވަތަ ނިޢްމަތްތަކެއް ސުވަރުގެ އިން ލިބެން އެބަހުރި ކަމެވެ. ނިކަން ބުނެބަލާށެވެ! މިއާޔަތުގައި ބަޔާންވެގެންވާ ނިޢްމަތްތައް ލިބުމުން އެމީހަކު އިތުރަށް ބޭނުންވާނެ އެއްވެސް ކަމެއް އޮންނާނެ ހެއްޔެވެ؟
ވަޢުދުފުޅު 2: ނޫރު (އަލިކަން)
"މުއްމިން ފިރިހެނުންނާއި، މުއްމިން އަންހެނުން، ކަލޭގެފާނު ދެކެވަޑައިގަންނަވާނޭ ދުވަހު، އެއުރެންގެ ކުރިމަތިންނާއި، އެއުރެންގެ ކަނާތްފަރާތުން، އެއުރެންގެ ނޫރު ހިނގަހިނގައި ހުންނާނެތެވެ. (އަދި އެއުރެންނަށް އަންގަވާނެތެވެ.) މިއަދު ތިއަބައިމީހުންނަށް އުފާވެރިކަމުގެ ޚަބަރު ހުއްޓެވެ. (އެއީ) އެތަންތަނުގެދަށުން ފެންކޯރުތައް ހިނގަ ހިނގާ ހުންނަ ސުވަރުގެތަކެވެ. އެތަންތަނުގައި އެއުރެން އަބަދަށް ދެމިތިބެނިވި ގޮތުގައެވެ. ބޮޑުވެގެންވާ ނަޞީބު ލިބުމަކީ ހަމަ އެއީއެވެ." ސޫރަތުލްޙަދީދް: 12
އެދުވަހަކީ ކަޅުކަން ގަދަ އަނދިރިކަމުގައި އިސްތަށްޓެއްހައި ހިމަ، ކަނޑިއެއްގެ މިޔަ އެއްފަދަ ޞިރާޠުމަގު ހުރަސްކުރަންޖެހޭނެ ދުވަހެވެ. އެފަދަ ވަގުތުގައި ﷲ ތަޢާލާ އަލިކަން ނުދެއްވެވި އަޅަކަށް ޞިރާޠު މަގު ހުރަސް ކުރެވޭނީ ކާކަށް ހެއްޔެވެ؟ މިއަލިކަން އަހަރެމެންނަށް ﷲ ތަޢާލާ ދެއްވަވާނީ ދުނިޔޭގައި ތިބެ އަހަރެމެންގެ ހިތްތައް އަލިކުރި މިންވަރަކުންނެވެ. ދުނިޔޭގައި ތިބެ ހިތްތައް އަލިކުރާކުރުން އަހަރެމެންގެ ލޮލަކަށް ނުފެންނާނެއެވެ. އެއަލިކަން އަހަރެމެންނަށް ފެނިގެންދާނީ ޤިޔާމަތް ދުވަހުއެވެ.
އަދި ނުނިމޭ
