ދުނިޔޭގެ ލީޑިން އެއާޕޯޓް ރިސޯޓްގެ އެވޯޑް އަނެއްކާވެސް ހުޅުލެ އައިލެންޑް ހޮޓެލް (އެޗްއައިއެޗް) އަށް ލިބިއްޖެ އެވެ. މިއީ މި އެވޯޑް އެޗްއައިއެޗަށް ލިބުނު 7 ވަނަ ފަހަރެވެ.
މި އެވޯޑް އެޗްއައިއެޗަށް ދީފައި ވަނީ ލިސްބަންގެ އާސާރީ ޕެޓިއޯ ޑަ ގާލޭގައި ބޭއްވި "ވޯލްޑް ޓްރެވަލް އެވޯޑްސް ގްރޭންޑް ފައިނަލް ގާލާ" ގައެވެ. އެޗްއައިއެޗުން މި އެވޯޑް އެންމެ ފުރަތަމަ ހޯދާފައިވަނީ 2011 ވަނަ އަހަރު އެވެ. އޭގެ ފަހުން ކޮންމެ އަހަރަކުވެސް މި އެވޯޑް އެޗްއައިއެޗަށް ލިބެމުން އަންނަކަން ފާހަގަކޮށްލެވެއެވެ
ދިވެހި ގައުމީ މައި ވައިގެ ބަނދަރު، ވެލާނާ އިންޓަނޭޝަނަލް އެއާޕޯޓް އޮންނަ ހުޅުލޭގައި ހިންގަމުން އަންނަ ހުޅުލެ އައިލެންޑް ހޮޓެލްގައި 136 ކޮޓަރި އާއި ޕްރައިވެޓް ބީޗަކާއި، އައުޓްޑޯ ޕޫލް އަދި ގޮލްފް ކޯސްއެއް ހުރެ އެވެ.
މި އެވޯޑް ޖެހިޖެހިގެން އެ ހޮޓެލުން ހާސިލުކުރުމަކީ، ދިވެހި ފަތުރުވެރިކަމުގެ ސިނާއަތް ކުރިއަރާފައިވާ މިންވަރު އަންގައިދޭ އަލިގަދަ ހެއްކެކެވެ.
ޒިދާން މުހައްމަދު
