ފުލުހުން ނެރެ ޤަވާއިދު ތަންފީޒުކުރަން ފަށަން ޖެހުނީ ބައެއް ޓެކްސީ ޑްރައިވަރުންގެ އަމަލުތައް ހުންނަ ގޮތުން މަޖުބޫރުވެގެން ކަމަށް ޓްރާންސްޕޯޓް އޮތޯރިޓީގެ އޮފިޝަލަކު ވިދާޅުވެއްޖެއެވެ.
އޭނާ ވިދާޅުވީ ހުޅުލެ އަށާއި ހުޅުމާލެއަށް ޓެކްސީގައި ދަތުރުކުރާނެ އަގުތައް އެ އޮތޯރިޓީން ކަނޑައެޅި ނަމަވެސް ތަންފީޒު ކުރަން ފެށުން ލަސްކުރީ އެ މައްސަލަ ޑްރައިވަރުން އަމިއްލައަށް ހަމަޖައްސާނެ ކަމަށް ބަލައިގެން ކަމަށެވެ. އަދި އެކަމަށް ވަގުތު ދިނުމުގެ ގޮތުން ކަމަށެވެ.
"ނަމަވެސް ކީއްތޯ ކުރާނީ 35 ރުފިޔާއަށް ކުރަންޖެހޭ ދަތުރަކަށް 100 ބޮޑު ކަމަށް ބުނީމާ ދެމަިން ބާލައި ހައިވޭ މައްޗަށް އެއްލައިލާ ހިސާބަށް ކަންކަން ދިއައިމަ.
ދެން އެދައްކަނީ ހުހާ އަންނަން ޖެހޭ ވާހަކަ. ހުޅުލޭ އެއާޕޯޓަކުން މާލެއަކަށް ނާންނާނެ ދެއްތޯ އެކޮޅަށް ދަތުރަކު ނުދާނަމަ. ވީމާ ހަމައެކަނި އެއްބައަކު ދައްކާ ވާހަކަ އެއް ނޫން އަޑުއަހަން ޖެހޭނީ." އޭނާ ވިދާޅުވީ ހުހާ އެއްކޮޅަށް ދަތުރުކުރަންޖެހޭ ވާހަކަ ދައްކާއިރު ގިނަ ފަހަރު ދަތުރު ކުރަނީ 4 މީހުން އަރުވައިގެން ކަމަށާއި އެއިން ކޮންމެ މީހަކު އަތުންވެސް 100 ރުފިޔާ ނަގާ ކަމުގެ ޝަކުވާތައްވެސް އަންނަނީ ލިބެމުން ކަމަށެވެ.
"4 މީހުން އަރުވާފަ 100 ރުފިޔާ ހަމަ ކުރަންވެސް ނަގަން ޖެހޭނީ މީހަކު އަތުން 25 ރުފިޔާ ނޫންތޯ؟ ނަމަވެސް ގިނަ ފަހަރު ހަމަ މީހަކުން ނަގަނީ 100 ރުފިޔާ.
ބައެއް ފަހަރު 80 ރުފިޔާ ނަގާފަވެސް އެބަހުރި. 2 މީހުން އަރުވާފަ މީހަކު އަތުން 80 ރުފިޔާ ނެގީމަވެސް އެ ނެގެނީ 160 ރުފިޔާ. 4 މީހުން އަރުވާފަ މީހަކު އަތުން 80 ރުފިޔާ ނެގީމަ އެބަ ނެގޭ 320 ރުފިޔާ. މީ ދެން ބޮޑުވަރު ނޫންތޯ؟" އޭނާ ސުވާލު ކުރެއްވިއެވެ. ޤަވާއިދުތައް ހަދަނީ ދެ ފަރާތުގެ ހައްޤުތައް ހިމާޔަތް ކުރުމުގެ ބޭނުމުގައި ކަމަށާއި ހަމަޖެހޭ އުޞޫލުތަކުގެ ތެރެއިން ނޫނީ އެއްވެސް ފަރާތަކުން ކަންކަން ކޮށްގެން ނުވާނެ ކަމަށްވެސް އޭނާ ވިދާޅުވިއެވެ.
