ދަރިވަރުންނަށް ހެނދުނުގެ ނާސްތާ ދިނުމަށް ސަރުކާރުން ކުރިއަށް ގެންދާ ޕްރޮގްރާމް ކުރިއަށް ގެންދާއިރު ޜާއްޖޭގައި މިހާރު އޮތް ސިޔާސީ ވާދަވެރިކަމުގެ ތެރެއިން ނާސްތާއަށް ވިހަލުން ފަދަ ކަމެއް ކޮށްފާނެ ކަމުގެ ބިރު އެބައޮތްކަން ރޭގެ ބައްދަލުވުމުގެ ބައިވެރިއަކު ވަނީ ހާމަކޮށްފައެވެ.
މި ޕްރޮގްރާމާއިބެހޭ ގޮތުން މައުލޫމާތު ދިނުމަށާއި ޢާންމުންގެ ޚިޔާލު ހޯދަން ރޭ އަމީނިއްޔާ ސްކޫލުގައި ކުރިއަށް ގެންދިއަ ބަދަލުވުމުގައި ބައިވެރިވި ބެލެނިވެރިއަކު ވަނީ މިފަދަ ކަމެއްވެސް ނުކުރާނެ ކަމަށް ނުބެލެވޭ ކަމަށް ބުނެ އެފަދަ ކަންކަމުން ސަލާމަތް ވުމަށް އަޅާނެ ފިޔަވަޅުތަކާއިބެހޭ ގޮތުން ސުވާލުކޮށްފައެވެ.
ރޭގެ ބައްދަލުވުމުގައި ތައުލީމީ ވަޒީރު ޑރ. ޢާއިޝަތު ޢަލީ ވިދާޅުވީ ސްކޫލްތައް ހުޅުވޭއިރު 25 ސްކޫލެއްގެ ދަރިވަރުންނަށް އަމާޒުކޮށްގެން ހެނދުނުގެ ނާސްތާ ދޭން ފެށި ނަމަވެސް ދެވަނަ ޓަރމްގައި ނާސްތާ ދޭން ކަނޑައަޅާފައިވާ ހުރިހާ ދަރިވަރުންނަށްވެސް ނާސްތާ ލިބޭނެ ކަމަށެވެ.
މިޕްރޮގްރާމްގެދަށުން ހެނދުނުގެ ނާސްތާ ދިނުމަށް ހަމަޖެހިފައިވަނީ ދަރިވަރުގެ ކެއުމާއި އަދި ޞިއްހަތާއިބެހޭ މައުލޫމާތު ހުށަހަޅައި އަދި ޕްރޮގްރާމްގައި ކުދިން ބައިވެރިކުރުމަށް އެދޭ ބެލެނިވެރިންގެ ކުދިންނެވެ. ބައެއް ބެލެނިވެރިންގެ އެންމެ ބޮޑު އެއް ކަންބޮޑުވުމަކަށްވީ ހެނދުނުގެ ނާސްތާ ދޭނެ ވަގުތެވެ.
އިންޓަރވަލަށް ލިބޭ ވަގުތުގައި އިންޓަވަލްވެސް ބައެއް ކުދިންނަށް ނުބޮވޭއިރު ނާސްތާ ދޭނީ ކޮން ވަގުތަކު ކަމާއިމެދު ނުވަތަ ކިހައި އިރެއް ކުރިން ދަރިވަރުން ސްކޫލަށް ގެންގޮސްގެން ކަމާއިމެދު ވެސް ބައެއް ބެލެނިވެރިން ސުވާލުކުރިއެވެ.
